Psom 41 - Nouvo Testaman Kreol Morisien Harmonisation NTPS KM

Lapriyer enn dimounn malad

Pou sef koral. Enn Psom David.

¹ Bienere dimounn ki pran kont ek ed bann pov kan zot dan difikilte, LESEGNER pou delivre zot.

² LESEGNER protez ek gard zot vivan; zot ere lor later. To pa abandonn zot dan lame zot lennmi.

³ LESEGNER pou pran zot swin ler zot malad e refer zot vinn fringan.

⁴ Mo ti konfese, “Mo finn fer pese kont twa SEGNER; pardonn mwa e donn mwa gerizon.”

⁵ Bann ki deteste mwa zot kalomnie mwa; zot swete ki mo mor e ki mo nom disparet.

⁶ Mem bann ki rann mwa vizit zot pa sinser; zot vinn tir linformasion e lerla zot fann rimer.

⁷ Tann zot pe mirmire dan zorey zot vwazin! Zot pe priye ki mo fini mal.

⁸ Zot dir, “Li pa pou sape ar sa maladi-la! Pena li sape sann-fwa la!”

⁹ Mem mo meyer kamarad, mo ti kapav met lame dan dife pou li; nou ti partaz tou li mars ar bann-la aster.

¹⁰ Me twa, SEGNER, par pitie re-donn mwa lasante e lerla mo fer mo lennmi peye.

¹¹ Mo kone ki to ena afeksion pou mwa, parski mo lennmi pa finn gagn viktwar lor mwa.

¹² To finn relev mwa akoz mo lintegrite, to pou gard mwa dan to prezans eternelman.

¹³ Laglwar pou Twa SEGNER, Bondie Izrael, aster, pli divan ek touletan. Amen! Amen!