Psom 40 - Nouvo Testaman Kreol Morisien Harmonisation NTPS KM

Anou sant louanz Lesegner

Pou sef koral. Enn Psom David.

¹ Mo ti atann, atann mem, sekour LESEGNER; Li ti ekout mwa e li ti tann mwa kriye.

² Li ti tir mwa depi dan trou lamor; fer mwa sap dan marekaz san fon, li ti poz mo lipie lor enn baz solid, danze napa koste, la kot mo marse.

³ Li ti montre mwa enn nouvo sante; montre mwa sant louanz Bondie. Boukou pou konpran, pou montre respe, e pou met zot konfians dan LESEGNER.

⁴ Bienere bann ki fer konfians LESEGNER, zot ki rezet idolatri ou ki refiz swiv bann fos bondie.

⁵ Zot vremem boukou, SEGNER, mo Bondie, bann mirak ek bann mervey ki to finn fer pou nou. Pena to segon! Mo anvi rakonte, rakonte mem, me konte fini, ankor ena mervey pou rakonte.

⁶ To pa bizin ofrand ek sakrifis; to finn donn mwa zorey pou tande. To pa bizin sakrifis ki bril zanimo ouswa sakrifis pou lav pese.

⁷ Lerla mo dir, “Ala mo la Bondie! Dan liv sakre mo trouv seki finn ekrir pou mwa.

⁸ Mo ena boukou plezir obeir to volonte, Bondie. Mo finn grav to lalwa dan mo leker.”

⁹ Dan lasanble kot to pep ti reini mo ti fer deklarasion ki LESEGNER finn sov nou. Nanye pa pou fer mwa aret proklam for-for sa laverite-la;

¹⁰ mo pa finn gard nouvel to delivrans la zis pou mwa. Mo finn koz ki to fidel e ki to sov nou, mo pa finn kasiet to lamour infini e to lwayote dan lasanble tou bann fidel.

¹¹ Pa refiz mwa to konpasion, SEGNER, ki to lamour infini ek to laverite touletan protez mwa.

¹² Traka partou otour mwa, tro boukou pou konte. Mo bann pese finn anvayir mwa, zot anpes mwa trouv kler. Zot plis ki seve lor mo latet zot fer mwa perdi kouraz.

¹³ Sov mwa, SEGNER, SEGNER, degaze ed mwa.

¹⁴ Ki bann ki pe rod mo lamor plonz dan laont ek konfizion; bann ki dezir trouv mo maler, fer zot konn defet ek imiliasion;

¹⁵ bann ki sikane ek moke fer zot gout defet e zot labous ferme.

¹⁶ Bann ki vinn ver twa, donn zot lazwa ek boner! Bann ki kontan twa kouma zot Sover, pou touletan dir, “LESEGNER pli gran ki tou!”

¹⁷ Mo feb ek pov, Segner, me zame to finn bliye mwa. Tomem mo sover, mo liberater, mo Bondie, pa tarde pou ed mwa!