Psom 4 - Nouvo Testaman Kreol Morisien Harmonisation NTPS KM

Lapriyer leswar pou dimann sekour

Pou sef koral pou akonpagnman ar instriman ki ena difil. Enn Psom David.

¹ Reponn mwa kan mo priye twa. Bondie tomem mo lazistis. Kan mo ti dan detres to finn liber mwa. Montre to bonte, ekout mo lapriyer.

² E zot, dimounn inportan, komie letan ankor zot pou mepriz mo laglwar? Komie letan ankor zot pou atase ar mansonz, e galoup deryer bann kiksoz initil?

³ Pa bliye ki LESEGNER finn met apar pou limem dimounn ki fidel, e LESEGNER tann mwa kan mo dimann so led.

⁴ Pa les lakoler fer zot tom dan pese; aswar lor zot lili, reflesi lor la e gard silans.

⁵ Ofer LESEGNER sakrifis ki bizin e met tou zot konfians dan li.

⁶ Boukou dimounn pe dir, “Kisann-la kapav fer nou trouv nou boner?” SEGNER, fer lalimier to prezans briy lor nou.

⁷ To finn met dan mo leker plis lazwa ki bann-la ena kan zot rekolt ek zot divin finn depas kantite.

⁸ Mo dormi trankil, mo somey pezib, parski to tousel O SEGNER vey lor mo sekirite.