Psom 39 - Nouvo Testaman Kreol Morisien Harmonisation NTPS KM

Konfesion enn dimounn malere

Pou sef koral. Pou Yedoutoun. Enn Psom David.

¹ Mo ti dir, “Mo pou fer atansion seki mo fer; atansion mo fer pese ar seki mo dir; dan prezans move dimounn mo pa pou dir nanye.”

² Mo ti ferm mo labous mem kan ti ena bon kiksoz pou dir. Me mo douler ti ogmante

³ e traka ti touf mwa. Plis mo reflesi, plis mo lespri trouble; mo oblize dimande,

⁴ “SEGNER, komie letan mo pou viv? Dir mwa komie letan reste. Lerla mo pou kone ki lavi bien kourt.”

⁵ Bann zour ki ena pou viv larzer lame. Mo lavi antie pa reprezant gran soz pou twa. Lavi dimounn li zis enn ti labriz,

⁶ dimounn ale vini kouma enn lonbraz. Tou seki nou fer pa vo nanye; nou ramas enn fortinn me pa kone kisann-la pou erite.

⁷ Aster-la, SEGNER, ki ena pou mo atann? Mo finn met mo lesperans an twa.

⁸ Delivre mwa dan tou mo bann pese, pa les bann ti-lespri sikann mwa.

⁹ Mo ferm mo labous! Refiz koze! Mo kone ki twa ki finn azir koumsa.

¹⁰ Aret tap lor mwa! To bann kou pe tir mo lavi.

¹¹ To koriz ek disiplinn bann imin pou zot pese, to ronz zot trezor kouma enn insek ronz enn fri. Lavi dimounn li zis enn ti labriz.

¹² Ekout mo lapriyer, SEGNER; tann mo douler kriye; vinn ed enn malere ki pe soufer. Kouma tou mo bann anset, mo enn etranze, mo vizit kot twa li bien kourt.

¹³ Donn mwa inpe repi, pou mo regagn enn sourir, avan mo gran depar.