Psom 38 - Nouvo Testaman Kreol Morisien Harmonisation NTPS KM

Lapriyer enn dimounn malere

Enn Psom David. Enn ofrand pou remersiman.

¹ SEGNER, mem to ankoler, pa kondann mwa; malgre to gran koler, pa pini mwa.

² To bann fles finn pers-pers mwa, to lame finn abat lor mwa.

³ Akoz to koler, mo ena douler partou; akoz mo pese, maladi fann dan tou mo lezo.

⁴ Mo pe nwaye dan kaskad pese; fardo-la tro lour pou sarye.

⁵ Akoz mo prop betiz mo blesir santi pi, pe fer infeksion;

⁶ mo korde ar douler, tout lazourne mo dan lapenn.

⁷ Lafiev pe bril mwa; pena lasante dan mo lekor.

⁸ Mo pena lafors. Mo kas-kase. Mo leker pe soufer, mo nek plengne.

⁹ Segner, to kone ki mo bann dezir ete. To tann mwa plengne ar douler;

¹⁰ mo leker bat for-for; mo gagn febles e mo trouv som.

¹¹ Kamarad ek vwazin pa koste ar mwa akoz mo infeksion; mem mo fami pa frekant mwa.

¹² Seki anvi touy mwa, pe met piez partou; bann ki pe rod fer mwa ditor, menas pou kas-kas mwa; zot pas zot letan konplote.

¹³ Mo kouma bann sourd, nepli tann bien; mo lalang amare, pa kapav koze.

¹⁴ Mo kouma enn dimounn ki nepli tande, mo pa kone ki pou reponn.

¹⁵ Mo finn met mo lespwar an twa, SEGNER; twa Segner, mo Bondie, to pou exos mo lapriyer.

¹⁶ Mo priye, “Pa les mo lennmi gagn lokazion riy mwa; pa les zot pran plezir trouv mwa glise ek tonbe.”

¹⁷ Mo lafin bien pre; douler fer mwa korde.

¹⁸ Mo konfes mo fot mo regret mo pese.

¹⁹ Mo bann lennmi paret bien for. Parmi, boukou ayir mwa san rezon.

²⁰ Bann ki retourn lemal pou lebien akiz mwa parski mwa mo finn swazir bon sime.

²¹ Pa abandonn mwa, SEGNER; Mo Bondie pa res lwin ar mwa.

²² Pa tarde pou ed mwa, Segner, mo Sover.