Psom 37 - Nouvo Testaman Kreol Morisien Harmonisation NTPS KM

Lazistis Bondie

Enn Psom David.

¹ Pa les move dimounn fatig to latet; pa bizin zalou dimounn malonet.

² Vit-vit zot pou sek kouma lerb ki griye ar soley; kouma fey ver vit-vit zot fletri.

³ Fer konfians LESEGNER e fer dibien; viv an sekirite lor later ki LESEGNER finn donn twa.

⁴ Si to rod to boner dan LESEGNER li pou donn twa dezir ki ena dan to leker.

⁵ Donn LESEGNER to lavi, met to konfians dan li, e li pou ed twa;

⁶ to drwatir pou briye kouma soley levan, e to lazistis kouma soley midi.

⁷ Gard silans divan LESEGNER, atann avek pasians; pa fatig to lespri ar sikse bann move dimounn ki paret pe reisi ar zot move plan.

⁸ Pa les lakoler oubien traka fatig twa; sinon to kapav mal fini.

⁹ Bann ki pratik lemal pou elimine, bann ki finn met zot konfians dan LESEGNER zot pou posed later.

¹⁰ Ankor enn tigit letan bann ki fer lemal pou disparet; rode kouma ou rode, ou pa pou trouv zot.

¹¹ Bon dimounn pou erit later e zot pou viv enn lavi prosper ek pezib.

¹² Bann move dimounn fer konplo kont bon dimounn e zot grins zot ledan ar laenn.

¹³ Sa fer LESEGNER riy zot, li kone zot pou zwenn zot lafin vit-vit.

¹⁴ Bann move dimounn fit kouto, prepar zarm pou touy bann pov e bann malere; pou asasinn bann ki viv lavi drwat;

¹⁵ me zot prop zarm pou fini zot e zot zarm pou kas bout par bout.

¹⁶ Sa ti trezor ki enn bon dimounn posede la, li vo plis ki tou larises ki tou bann modi posede.

¹⁷ Zarm bann ki fer lemal pou brize, me LESEGNER soutenir bann ki viv drwat.

¹⁸ LESEGNER konn lavi bann ki obeir li e zot pou posed sa pei-la pou touzour.

¹⁹ Kan move sezon vini, zot pa pou soufer; kan lafaminn rantre, zot pa pou mordefin.

²⁰ Me bann ki fer lemal pou mor; lennmi LESEGNER pou mor kouma fler sovaz dan soley; zot pou disparet kouma lafime dan koudvan.

²¹ Move dimounn kontan pran prete me zame li ranbourse; bon dimounn li zenere e li kontan partaze.

²² Kan LESEGNER beni ou, ou pou okip later; me si li modi ou, pa pou ena plas pou ou okenn plas.

²³ LESEGNER gid nou lor bon sime e li protez bann ki swiv drwatir.

²⁴ Si zame enn bon dimounn tonbe vit-vit LESEGNER pou ed li leve.

²⁵ Aster mo vie; mo finn viv bien lontan; e zame, ou tande, zame mo finn zwenn enn fidel ki LESEGNER finn abandone; zame mo finn trouv so bann zanfan mandie dipin.

²⁶ Touletan li zenere e li ed lezot e so zanfan zot enn benediksion pou li.

²⁷ Rezet lemal e fer dibien, zot pou kontinie viv lor later promiz

²⁸ parski LESEGNER kontan drwatir e li pa abandonn so serviter fidel. Zot gagn so proteksion touletan me desandan move dimounn pou perdi tou.

²⁹ Bann ki swiv bon sime pou posed later e viv lor la pou touletan.

³⁰ Parol ki bon dimounn koze li ena sazes ek zistis.

³¹ Dan profon so leker li gard lalwa Bondie e nanye pa kapav fer li tonbe.

³² Move dimounn vey bon dimounn dan kwin lizie e vey moman pou touy inosan;

³³ me LESEGNER pa pou les lemal fer ravaz ouswa les bann inosan pey pou koupab dan zizman.

³⁴ Met lespwar dan LESEGNER e ekout so konsey; li pou donn ou loner vinn proprieter ou later; parkont bann move dimounn pou perdi tou.

³⁵ Mo ti konn enn move dimounn ki ti enn dominer; li ti dominn lezot, koumadir enn gro pie lafours.

³⁶ Inpe pli tar ler mo ti pas dan mem landrwa so bout pa ti trouve. Rod li partou. Introuvab!

³⁷ Pran kont bon dimounn; get konportman dimounn drwat. Dimounn ki travay pou lape li ena desandan;

³⁸ bann ki dan pese, enn zour pa enn zour, zot fini net. Zot pa kit nanye deryer zot.

³⁹ LESEGNER sov bann dimounn drwat e li protez zot kan zot dan difikilte.

⁴⁰ Li ed zot, li delivre zot. Li delivre zot dan grif bann ki fer lemal, li sov zot, parski zot finn al rod sekour kot li.