Psom 36 - Nouvo Testaman Kreol Morisien Harmonisation NTPS KM

Bondie lasours lavi

Pou sef koral. Enn Psom David, serviter LESEGNER.

¹ Dan mo leker mo mazinn koze move dimounn ki dir, “Mo pa trouve kifer bizin tranble divan Bondie.”

² Zot telman flat zotmem ki zot pa rekonet zot fot, ni deteste zot pese.

³ So labous plin ar kalomni ek mansonz; li tourn so ledo ar lasazes, li aret fer dibien.

⁴ Li tir plan pou fer ditor kan li pe alonze lor so lili; li angaz limem pou swiv move sime, li pa rezet lemal.

⁵ SEGNER, to lamour infini al tous lesiel, to fidelite mont ziska bann niaz.

⁶ To drwatir li pli ot ki montagn pli ot; to lazistis gran ek profon kouma losean. SEGNER, to prezerv dimounn ek zanimo.

⁷ Bondie, to lamour infini samem nou pli gran trezor; anba to lezel tou dimounn santi zot an sekirite;

⁸ dan labondans to lakaz, to konble zot ar manze, zot bwar dan larivier to bonte.

⁹ Tomem lasours lavi e to lalimier ekler nou lavi.

¹⁰ Donn to lamour dimounn ki rekonet to grander e lazistis bann ki ena leker drwat.

¹¹ Pa permet bann fezer kraz mwa anba zot lipie, e pa les lame move dimounn sas mwa.

¹² Get laba! Bann move dimounn pe manz lapousier. Pena zot releve.