Psom 34 - Nouvo Testaman Kreol Morisien Harmonisation NTPS KM

Louanz pou bonte Bondie

Enn Psom David. Devan lerwa Abimelek, David fer sanblan li fou. Lerla Abimelek ti pous li. Letan David finn ale li konpoz sa Psom la.

¹ Touletan mo pou remersie LESEGNER; zame mo pa pou aret sant so louanz.

² Mo pou loue li pou tou seki li finn fer; bann ki dan soufrans, ekout mwa e ki lazwa ranpli zot leker.

³ Ansam ar mwa anou proklam grander LESEGNER; anou sant ansam laglwar LESEGNER.

⁴ Mo ti dimann LESEGNER vinn ed mwa e li ti reponn, li ti balie prop tou mo bann angwas.

⁵ Bann ki fer li konfians zot dan bien; zot pena laont lor zot figir.

⁶ Enn malere kriy osekour; LESEGNER finn tann li, e finn sov li dan tou so detres.

⁷ So bann anz kanp otour bann ki respekte LESEGNER, e li sov zot.

⁸ Goute e gete kouma LESEGNER li bon. Bienere bann ki swazir so proteksion.

⁹ Zot tou zot bizin onor LESEGNER parski bann ki obeir so instriksion zame pa pou mank nanye.

¹⁰ Bann dimounn pwisan kapav konn lafin ek laswaf, me bann ki obeir LESEGNER pou touletan gagn seki zot bizin.

¹¹ Vini zenes, koste kot mwa; les mo montre zot kouma respekte LESEGNER.

¹² To anvi viv bien? To anvi viv lontan dan lazwa?

¹³ Alor aret koz lemal; aret koz manti.

¹⁴ Evit lemal e fer dibien; fer zefor pou ki lape fleri partou.

¹⁵ LESEGNER protez bann ki dan bon sime e li ekout zot douler;

¹⁶ LESEGNER deteste bann ki dan lemal e ler zot mor zot disparet dan memwar bann dimounn.

¹⁷ Bann ki dan bon sime apel osekour, LESEGNER tann zot, li tir zot dan zot langwas.

¹⁸ LESEGNER li touletan pre ar seki pe perdi kouraz; li replant lespwar kot lespwar finn mor.

¹⁹ Dimounn ki obeir Bondie fer fas boukou traka me LESEGNER delivre li dan tousala;

²⁰ li vey lor tou lezo dimounn-la, pa enn sel pou brize.

²¹ Lemal li detrir bann ki fer lemal; bann ki ayir bon dimounn zame zot pou sape.

²² LESEGNER pou touletan sov so pep; bann ki al ver li pou gagn so proteksion e pa pou gagn kondanasion.