Psom 33 - Nouvo Testaman Kreol Morisien Harmonisation NTPS KM

Anou sant louanz Lesegner Bondie

¹ Tou ki viv dan drwatir sant for-for zot lazwa dan LESEGNER. Li bon sant so louanz tou dimounn ki obeir li.

² Dir mersi LESEGNER ar lagitar; selebre li ar lamizik lor sitar.

³ Sant sante ki zorey pa finn ankor tande; zwe bann instriman ar talan e kriy zot lazwa.

⁴ Parol LESEGNER zot vre; tou seki li fer, zot parfe dan so fidelite.

⁵ LESEGNER kontan tou seki drwat ek zis; So lamour infini prezan partou lor later.

⁶ LESEGNER ti kree liniver par so parol; par souf so labous li ti donn nesans soley, lalinn ek zetwal.

⁷ Li ramas tou dilo dan enn sel plas; li met tou bann losean dan enn ladig imans.

⁸ Later antie bizin ador LESEGNER! Tou bann abitan dan lemond bizin ena gran respe divan li!

⁹ Li pronons parol, li kree lemond; Li donn lord, liniver pran nesans.

¹⁰ LESEGNER kas plan bann diferan popilasion; Li anpes zot realiz zot bann proze.

¹¹ Me LESEGNER so plan li res valab touletan; so proze li res vivan eternelman.

¹² Enn nasion li ere kan LESEGNER limem so Bondie, enn pep li bienere si LESEGNER finn swazir li kouma so prop dibien.

¹³ Depi lesiel LESEGNER get limanite anba;

¹⁴ depi so tronn lao li obzerv tou bann abitan lor later.

¹⁵ Limem ki ti form zot leker e li kone tou seki zot fer.

¹⁶ Enn lerwa pa gagn lager zis parski so larme gran ek for; enn solda pa gagn laviktwar zis parski li fizikman for;

¹⁷ bon seval pa ase pou amenn laviktwar; zis so lafors pa ase pou sov so kavalie.

¹⁸ LESEGNER vey lor bann ki ena respe pou li; bann ki fer konfians so lamour infini.

¹⁹ Li anpes lamor koste e li nouri zot, mem kan lafaminn pe fer ravaz.

²⁰ Avek lespwar nou atann lor LESEGNER; li protez nou e li ed nou.

²¹ Limem ki donn lazwa ki dan nou leker, nou ena konfians dan Bondie ki sin.

²² SEGNER, donn nou touletan to lamour infini parski nou lespwar li zis dan twa.