Psom 32 - Nouvo Testaman Kreol Morisien Harmonisation NTPS KM

Pardon Lesegner rann nou ere

Enn Psom David. Instriksion.

¹ Bienere sa dimounn ki so ofans efase, ki so pese pardone!

² Bienere bann dimounn lor ki LESEGNER pa met okenn sarz, e LESEGNER deklare ki pena frod dan so leker.

³ Kan mo pa ti konfes mo pese sa ti ronz mwa lanwit-lizour, mo ti deperi.

⁴ Lanwit-lizour to lame ti koriz mwa; mo lafors koumans fonn kouma laroze ler soley leve.

⁵ Lerla mo ti desid pou konfes mo pese ar twa; pa ti kasiet okenn fot. Mo dir, “Mo bizin konfes mo pese avek LESEGNER.” E twa to ti pardonn mwa.

⁶ Akoz sa tou to bann serviter fidel bizin priye twa kan problem leve; kan inondasion pe fons lor zot, zot kone zot ena to proteksion.

⁷ Tomem mo labri; twa ki protez mwa ler siklonn pe tape, e bann sante lor to delivrans pou partou otour mwa.

⁸ Mo pou ansegn twa e montre twa ki sime bizin pran; Mo pou gid twa e konsey twa.

⁹ Pa fer teti kouma seval ek bourik ki zis konpran kravas ek brid; lerla nanye pa pou ariv twa.

¹⁰ Lasoufrans pe atann bann ki fer lemal me bann ki met zot konfians dan LESEGNER zot proteze par so lamour infini.

¹¹ Zot ki viv dan drwatir, dans avek lazwa dan LESEGNER! Kriye zot lazwa, zot ki ena leker drwat.