Psom 31 - Nouvo Testaman Kreol Morisien Harmonisation NTPS KM

Konfians dan Lesegner

Pou sef koral. Enn Psom David.

¹ Mo vinn ver twa, SEGNER, pou dimann proteksion; pa les mwa tom dan laont; dan to fidelite, delivre mwa.

² Ekout mo lapriyer; vinn delivre mwa vit. Tomem sitadel ki protez mwa; tomem fortres ki sov mwa.

³ Twa ki mo sitadel ek mo fortres gid mwa e montre mwa bon sime.

⁴ Anpes mwa tom dan piez ki finn plase pou mwa, parski tomem mo proteksion kont danze.

⁵ Mo finn met mo lavi dan to lame; to delivre mwa, SEGNER, Bondie fidel.

⁶ To ayir bann ki ador fos bondie; mwa, mo met tou mo konfians dan LESEGNER.

⁷ Mo selebre lazwa ek boner dan to lamour infini parski to konn mo soufrans ek traka ki pe kraz mwa.

⁸ To finn anpes mo lennmi may mwa; to finn kas mo lasenn, to finn donn mwa laliberte.

⁹ SEGNER, ena pitie pou mwa parski mo dan tourman; mo lizie bien fay parski mo larm finn bril li; mo lekor antie feb ek mo fatige;

¹⁰ Gro sagrin finn rwinn mo lasante e larm pe ris mwa ver lamor. Mo bann tor finn afebli mwa e mo lezo pe deperi.

¹¹ Mo lennmi, sirtou mo prop vwazin mepriz mwa; bann ki konn mwa zot per mwa; kan zot trouv mwa, zot sove al kasiet.

¹² Dimounn finn fini bliye mwa, koumadir mo finn fini mor; mo initil kouma lasiet ki finn brize.

¹³ Mo tann mo lennmi pe mirmire; dife lor mwa partou kote. Zot pe tir plan kont mwa; zot pe konplote pou touy mwa.

¹⁴ Me mo met tou mo konfians an twa, O SEGNER; mo dir, “Twa ki mo Bondie.”

¹⁵ Mo bann zour dan to lame; protez mwa kont mo lennmi; ed mwa kont seki pe persekit mwa.

¹⁶ Ki lalimier to prezans briy lor mwa, to serviter; sov mwa dan to lamour infini.

¹⁷ Pa les mwa tom dan laont, SEGNER, parski mo finn kriye ver twa; me ki move dimounn konn laont, les zot koule an silans dan trou lamor.

¹⁸ Ferm zot labous dan silans lamor! Zot ki bann gran manter insolan ek arogan ki zet labou lor dimounn ki viv drwat.

¹⁹ Li vreman gran sa bonte ki to rezerve pou dimounn ki ena respe pou twa! Devan lizie tou dimounn to montre to bonte pou bann ki fer twa konfians.

²⁰ To prezans garanti zot sekirite e anpes zot tom dan piez bann maniganser; dan labri kot to finn kasiet zot, insilt zot lennmi pa pe reisi fer zot dimal.

²¹ Tou louanz pou LESEGNER! Li merveye, manier li ti donn mwa so lamour infini ler lennmi ti pe anserkle mwa pou atake!

²² Mo ti dezanpare ek trouble, mo ti krwar Bondie ti finn abandonn mwa. Me li ti tann mwa ler mo kriye osekour.

²³ Ador LESEGNER zot so bann fidel! LESEGNER protez bann krwayan; Li pini bann vantar, ki pou pey doub.

²⁴ Pa bes lebra; pa perdi kouraz zot tou ki finn met zot lesperans dan LESEGNER.