Psom 30 - Nouvo Testaman Kreol Morisien Harmonisation NTPS KM

Mersi Segner Bondie

Enn Psom David. Enn kantik pou dedikas Tanp.

¹ Mo proklam to grander, SEGNER, parski to finn sov mwa e to finn anpes mo lennmi imilie mwa.

² O SEGNER, mo Bondie, mo ti kriye osekour e to ti geri mwa;

³ SEGNER to remont mwa pou lamor pa anglouti mwa. Mo ti pe al ver trou lamor me to ti re-donn mwa lavi.

⁴ Zot tou bann fidel sant louanz LESEGNER! Selebre so nom ki sin, e dir li mersi.

⁵ So koler tengn vit me so bonte li permanan. Si aswar larm kapav koule gramatin lazwa briye.

⁶ Mo ti santi momem an sekirite e mo ti dir, “Mo pa pou konn defet.”

⁷ SEGNER, to ti bien bon anver mwa; to proteksion ti kouma enn sitadel lor montagn. Me ler to ti tourn to ledo ar mwa mo ti gagn bien per.

⁸ Ver twa mo ti kriye osekour, SEGNER; mo ti sipliy lesegner,

⁹ “Ki lavantaz ena dan mo lamor, si mo desann dan lafos lamor? Eski lapousier pou sant to laglwar? Eski zot kapav proklam to fidelite?

¹⁰ SEGNER, ekout mwa! Pran mwa kont! Ed mwa SEGNER!”

¹¹ To finn fer mo tristes vinn enn ladans ki exprim lazwa; to finn efas mo sagrin e plonz mwa dan boner,

¹² pou ki mo leker loue twa, e pa gard silans! Bizin sant to grander. SEGNER, twa ki mo Bondie, mo pa pou aret dir twa mersi.