Psom 29 - Nouvo Testaman Kreol Morisien Harmonisation NTPS KM

Lavwa Lesegner omilie siklonn

Enn Psom David.

¹ Donn LESEGNER, zot bann kreatir lesiel, donn LESEGNER so laglwar ek so pouvwar.

² Donn LESEGNER laglwar ki so nom merite, ador LESEGNER ki sin, ler li paret dan so mazeste.

³ Lavwa LESEGNER rezone lor lamer; Bondie laglwar rezone kouma toner, LESEGNER rezone lor tou bann losean.

⁴ Lavwa LESEGNER ranpli ar pwisans. Lavwa LESEGNER ranpli ar mazeste.

⁵ Lavwa LESEGNER frakas bann pie, pie pli for ki ena dan Liban;

⁶ Li fer montagn Liban sot-sote kouma ti vo; e montagn Ermon sot-sote kouma ti toro.

⁷ Lavwa LESEGNER fer zekler alime.

⁸ Lavwa LESEGNER fer dezer tranble, mem dezer dan Kades tranble.

⁹ Bann gran pie tranble ar lavwa LESEGNER; tou fey dan lafore grene. Lerla adorater LESEGNER kriye, “Laglwar pou Twa Bondie.”

¹⁰ LESEGNER lor so tronn dominn tou bann losean. LESEGNER limem lerwa eternel.

¹¹ LESEGNER donn lafors so pep, ki LESEGNER beni so pep e donn li lape.