Psom 28 - Nouvo Testaman Kreol Morisien Harmonisation NTPS KM

Lapriyer pou dimann sekour

Enn Psom David.

¹ Ver twa, SEGNER, mo apel osekour! Tomem mo sitadel, pa refiz ekout mwa. Si to gard silans mo pou kouma bann ki desann dan trou lamor.

² Pran mwa kont ler mo apel osekour; tann mo detres ler mo lev lame lao dan lapriyer ver to Tanp ki sin.

³ Pa met mwa dan mem panie ar move dimounn ki viv dan lemal, bann ki ena disik dan labous me fiel dan leker.

⁴ Pini zot pou zot move aksion, e dapre lemal ki zot finn fer; pini zot pou tou malpropte ki zot fer; e dapre seki zot merite.

⁵ Zot pa pran okenn kont travay LESEGNER, ni aksion ki so lame finn fer. Akoz samem li pou demolir zot e zame li pou re-batir zot.

⁶ Mo loue to nom SEGNER! LESEGNER finn tann mo lapriyer.

⁷ LESEGNER protez mwa, li defann mwa; mo finn met mo konfians dan li. Li ed mwa e li met lazwa dan mo leker. Ala kifer mo sant kantik pou dir li mersi.

⁸ LESEGNER limem lafors so pep; li fortres ki sov lerwa ki li finn konsakre.

⁹ SEGNER sov to pep e beni to dibien personel. Vinn zot berze e pran zot swin aster, pli divan e touletan.