Psom 26 - Nouvo Testaman Kreol Morisien Harmonisation NTPS KM

Lapriyer enn bon dimounn

Enn Psom David.

¹ SEGNER proklam mo inosans parski mo finn viv enn lavi san repros, e mo finn met mo konfians dan LESEGNER, konfians ki pa bouze.

² Examinn mwa, teste mwa, SEGNER, examinn mo lespri ek mo santiman.

³ To lamour infini gid mo pa, to fidelite diriz mo lavi.

⁴ Mo pa frekant dimounn malonet, ni mars ar bann ipokrit;

⁵ mo deteste bann ki viv dan pese e mo evit koste ar bann move dimounn.

⁶ Mo lav mo lame pou montre mo inosans; mo mars dan lapriyer otour to lotel, SEGNER.

⁷ Mo sant sante remersiman e rakont for-for tou bann mervey ki to finn fer.

⁸ O SEGNER, mo kontan lakaz kot to viv; e landrwa kot to laglwar li prezan.

⁹ Pa tret mwa parey dimounn ki dan pese; pa pran mo lavi kouma pran lavi bann kriminel;

¹⁰ zot lame ranpli ar trafik malprop; zot lame drwat pare pou aksepte gous.

¹¹ Me mwa, mo viv enn lavi san repros; ena pitie, delivre mwa!

¹² Mo lipie repoz lor fondasion solid; dan bann gran lasanble mo pou loue LESEGNER.