Psom 25 - Nouvo Testaman Kreol Morisien Harmonisation NTPS KM

Segner Bondie, gid nou e protez nou

Enn Psom David.

¹ O SEGNER, mo ofer twa lapriyer e adorasion.

² Mo Bondie, mo met mo konfians an twa. Pa les mwa gagn laont; pa les mo lennmi gagn laviktwar lor mwa.

³ Bann ki kont lor twa pa pou tom dan laont; Zot pou tom dan laont, bann ki trayir san okenn rezon.

⁴ SEGNER, montre mwa to bon sime; ansegn mwa swiv to parkour.

⁵ Gid mwa dan to laverite e ansegn mwa parski tomem Bondie ki sov mwa. Mo kont lor twa toulezour mo lavi.

⁶ Pa bliye, SEGNER, konpasion ek lamour infini ki to finn donn nou depi koumansman.

⁷ Pa rapel mo bann erer ek bann pese zenes; me dapre to lamour infini, rapel mwa akoz to bonte, SEGNER.

⁸ Parski LESEGNER li bon ek li drwat, li ansegn bann peser ki sime ki bon.

⁹ Ar li dimounn pa vantar zot aprann seki drwat parski li montre zot so bon sime.

¹⁰ Ar lamour infini ek fidelite li gid dimounn ki gard so lalians e ki obeir so instriksion.

¹¹ Akoz to nom, SEGNER, pardonn mo bann tor, zot grav.

¹² Bann ki ena reverans pou LESEGNER li pou montre zot ki sime bizin swiv.

¹³ Zot pou viv dan prosperite e zot zanfan pou posed later.

¹⁴ LESEGNER ena lamitie pou seki obeir li e li konfirm so lalians ar so bann fidel.

¹⁵ Mo tourn ver LESEGNER pou gagn so led e li touletan sap mwa dan bann piez.

¹⁶ Tourn ver mwa, SEGNER, ena pitie pou mwa, parski mo tousel ek mo dan lapenn.

¹⁷ Langwas finn miltipliye dan mo leker, liber mwa dan mo detres.

¹⁸ Pran kont mo detres ek mo soufrans, efas tou mo bann pese.

¹⁹ Nek gete ki kantite lennmi ki otour mwa e gete kouma zot ayir mwa avek violans.

²⁰ Protez mwa, sov mwa; anpes mwa tom dan laont. Zis to tousel ki kapav garanti mo sekirite.

²¹ Fer ki lonette ek drwatir prezerv mwa parski ar lesperans mo kont lor twa.

²² Bondie, liber lepep Izrael dan so tourman!