Psom 22 - Nouvo Testaman Kreol Morisien Harmonisation NTPS KM

Dezespwar ek lespwar

Pou sef koral. Zwe sa lor ler “Serf dan boner gramatin”. Enn Psom David.

¹ Bondie, mo Bondie, kifer to finn abandonn mwa? Dan dezespwar mo kriye osekour, me to sekour pa vini.

² Mo Bondie, lizour mo sipliy twa ed mwa, me san repons; lanwit mo kriye, mo pa gagn okenn repo.

³ Pourtan tomem sel Bondie ki Sin; to lor to tronn, omilie louanz lepep Izrael.

⁴ Nou anset ti met zot konfians total dan twa; zot ti fer twa konfians e to ti delivre zot.

⁵ Zot ti sipliy twa vinn ed zot, e to ti sov zot; zot lafwa ti dan twa e zame zot ti regrete.

⁶ Me mwa, pa kapav dir mo enn imin; mo kouma enn lever; bann dimounn insilte mwa, lepep rezet mwa.

⁷ Tou dimounn mepriz mwa, mok mwa; zot boufonn mwa, zot fer grimas.

⁸ Zot dir, “Get li! Li fer konfians LESEGNER! Kifer to Bondie pa vinn delivre twa? Si li kontan twa kifer li pa vinn ed twa?”

⁹ Pourtan Bondie, twa ki ti ed mwa travers lakousman; twa ki ti poz mwa an sekirite pre kot leker mo mama.

¹⁰ Depi mo nesans finn konfie mwa dan to lame; depi dan vant mo mama tomem mo Bondie.

¹¹ Bondie, pa res lwin ar mwa. Traka ek danze pe koste. To tousel kapav ed mwa.

¹² Mo lennmi pe antour mwa kouma toro feros; kouma toro ki sorti Basann zot pe fons otour mwa.

¹³ Zot mizo ouver kouma lion afame ki pou desir mwa bout par bout.

¹⁴ Mo lafors pe ale, pe koule kouma dilo; tou bann lezo dan mo lekor finn disloke net, e mo leker kouma lasir, li pe fonn dan mwa.

¹⁵ Mo labous sek; mo lalang tas ar mo pale; mo lagorz amare. Koumadir to finn larg mwa dan lapousier lamor!

¹⁶ Bann lisien pe tom lor mwa; enn group kriminel finn anserkle mwa, zot pers mo lame mo lipie.

¹⁷ Mo finn vinn lapo-lezo, tou mo lezo deor; dimounn fixe zot regar lor mwa;

¹⁸ mo lennmi pe lager pou gagn mo linz; zot tir lakourtpay.

¹⁹ Me twa, SEGNER, pa res lwin ar mwa! Vini vit, vinn sov mwa, twa mo lafors!

²⁰ Anpes lepe mo lennmi pran mo lavi; sov mwa dan grif bann lisien;

²¹ anpes lion devor mwa; protez mwa kont korn bann toro sovaz. To finn reponn mwa!

²² Mo pou rakont tou dimounn tou seki to finn fer; dan nou lasanble mo pou sant to louanz.

²³ Zot tou ki respekte ek ador LESEGNER, donn li laglwar! Zot tou desandan Zakob, donn li tou loner! Zot tou pep Izrael, ador li avek reverans!

²⁴ Li pa abandonn ni mepriz bann malere; zame li pa bliye zot douler. Li pa detourn so regar, li touletan reponn lapel dimounn pov ki dimann led.

²⁵ Tomem lasours mo louanz dan gran lasanble bann fidel; mo pou akonplir mo promes devan tou bann ki ador twa.

²⁶ Pou ena boukou manze pou bann pov; bann ki pe rod LESEGNER pou loue li. Ki LESEGNER donn zot tou boner ek prosperite pou touletan.

²⁷ Ziska finfon later, zot tou pou rapel e zot tou pou retourn ver LESEGNER. Bann fami diferan tribi ek nasion pou prostern devan li ek ador li.

²⁸ Limem SEGNER lerwa ki diriz liniver.

²⁹ Tou bann ki ris pou fer fet e pou ador Lesegner; seki pe desann dan lapousier lamor, seki pa kapav gard lavi, pou bes latet divan so grander.

³⁰ Zenerasion fitir pou servi li; enn zenerasion pou rakont enn lot grander nou Segner.

³¹ Zanfan ki pa finn ankor ne enn zour pou tann dir, “Lesegner ti defann e protez so pep.”