Psom 21 - Nouvo Testaman Kreol Morisien Harmonisation NTPS KM

Louanz pou laviktwar

Pou sef koral. Enn Psom David.

¹ SEGNER, lerwa dan lazwa parski to finn donn li lafors; li pe selebre parski to finn donn li laviktwar.

² To finn satisfer dezir so leker, to pa finn refiz seki li finn dimande.

³ To finn beni so lavi ar boukou benediksion, e lor so latet to finn plas enn kouronn lor fin.

⁴ Li ti dimann twa lavi e to finn donn li lavi ki dire pou touzour.

⁵ So laglwar li gran parski ena to lame laviktwar ladan; to finn donn li repitasion ek mazeste.

⁶ To finn beni li pou touletan; e to prezans ranpli li ar lazwa.

⁷ Lerwa finn met so konfians dan LESEGNER, e akoz lamour infini Bondie Pli Lao nanye pa pou bouz lerwa kot li ete.

⁸ To lame pou sezi tou to bann lennmi; to pwisans pou sezi bann ki ayir twa.

⁹ Kan to aparet to pou anflam zot kouma dibwa sek dan four; LESEGNER so lakoler pou anglouti zot e dife pou devor zot.

¹⁰ Okenn zot desandan pa pou sape; zot zanfan pou efase parmi limanite.

¹¹ Mem si zot konplot lemal kont twa e prepar enn move kou, zot pa pou reisi

¹² parski to zarm ki viz zot li redoutab e li pou fer zot zet zarm, sove ale.

¹³ Lev twa SEGNER, montre to pwisans! Nou, nou pou sante ek nou pou loue to pouvwar.