Psom 20 - Nouvo Testaman Kreol Morisien Harmonisation NTPS KM

Segner Bondie, donn nou laviktwar

Pou sef koral. Enn Psom David.

¹ Mo priye ki LESEGNER reponn ou kan ou dan lapenn! Ki Bondie, ki nou anset Zakob ti priye, protez ou.

² Mo priye ki li avoy ou so led depi Tanp sakre e beni ou depi montagn Sion.

³ Ki li aksepte tou ou bann ofrand e ki ou sakrifis fer li plezir.

⁴ Mo priye ki li donn ou seki ou bizin e ki li fer ou bann plan realize.

⁵ Nou pou kriy nou lazwa pou partaz ou laviktwar, nou pou loue nou Bondie ar bann banier pou selebre ou triyonf. Mo priye ki LESEGNER realiz tou ou dezir.

⁶ Mo sir aster ki LESEGNER pou donn laviktwar so lerwa ki li finn konsakre; Bondie pou reponn lerwa depi so sanktier dan lesiel e par so pwisans pou donn li laviktwar.

⁷ Ena ki krwar dan saryo ki servi pou lager; ena ki krwar dan pwisans so seval, me nou, nou fer konfians LESEGNER nou Bondie.

⁸ Bann ki krwar dan saryo ek dan seval pou pliye ek pou tonbe me nou, nou pou leve e nou pou tini dibout.

⁹ SEGNER, donn lerwa laviktwar. Reponn nou letan nou apel twa!