Psom 2 - Nouvo Testaman Kreol Morisien Harmonisation NTPS KM

Bondie konsakre so Lerwa

¹ Kifer bann nasion pe rod deklans enn deboulman pou nanye? Kifer bann pep pe konplote dan vid?

² Zot bann lerwa lor later pe prepar lager, zot bann dirizan pe vinn ansam kont LESEGNER e kont lerwa ki li finn konsakre.

³ Zot dir, “Anou kas lakord zot regn; plis ki sa, anou eklat zot lasenn.”

⁴ LESEGNER ki pe asiz lor so tronn lao dan lesiel pe riye e pran zot pou enn bann boufon.

⁵ Li averti zot dan so gran lakoler, e laflam so lakoler fer zot tranble.

⁶ Li dir zot, “Mwa ki finn swazir mo lerwa, mo finn instal li lor Sion, montagn sakre.”

⁷ Lerwa dir, “Les mo anons zot deklarasion LESEGNER. Li finn dir mwa, ‘Zordi, zour to kouronnman, to finn vinn mo garson e mwa mo finn vinn to Papa.

⁸ Nek dimann mwa e tou bann nasion pou vinn pou twa; nek dimande, e later antie pou vinn to rwayom.

⁹ Lerla to va diriz zot avek lafors ki ena dan enn feray e kas-kas zot kouma gargoulet ki fer ek later.’ ”

¹⁰ Alor, zot ki bann lerwa, servi lasazes; zot ki dirizan lor later, fer atansion.

¹¹ Obeir LESEGNER ar boukou respe; exprim zot lazwa, avek tranbleman.

¹² Met zot azenou divan li. Pa bliye so lakoler anflame vit e zot kapav zwenn lamor lor sime. Bienere tou dimounn ki mars ar li e ki gagn so proteksion.