Psom 17 - Nouvo Testaman Kreol Morisien Harmonisation NTPS KM

Lapriyer enn inosan

Enn lapriyer David.

¹ SEGNER, ekout mo lapriyer ki demann lazistis; tann mwa ki pe apel osekour; pa ignor enn lapriyer onet.

² Ki mo zizman li sorti kot twa, parski to trouv ki bon, ki drwat.

³ Si to examinn fon mo leker; si pandan lanwit to vey mwa, si to teste mwa, to pa pou trouv okenn blam kont mwa. Mo labous zame dir move kiksoz

⁴ kouma lezot fer; mo prefer ekout to konsey ek evit sime violans.

⁵ Mo finn touletan mars lor sime ki to finn trase e zame mo pa finn derape.

⁶ Mo apel twa O Bondie parski mo kone to pou reponn mwa; mo sipliy twa ekout mwa ar pasians, ekout parol ki mo pe dir twa.

⁷ Montre mwa to gran lamour fidel, twa ki ofer proteksion bann ki rod sekour kot twa; zot sap dan lame bann agreser.

⁸ Protez mwa kouma trezor pli presie devan to lizie; kasiet mwa dan lonbraz to lezel

⁹ kont move dimounn ki rod fer mwa dimal, kont lennmi ki pe antour mwa.

¹⁰ Zot leker ros, san okenn pitie, e zot labous ranpli ar larogans.

¹¹ Zot lasas mwa; kot mo bouze zot otour mwa; zot pe vey lokazion pou fer mwa manz lapousier.

¹² Kouma lion zot pare pou desir-desir mwa. Parey enn zenn lion zot pe atann dan kasiet pou sot lor mwa.

¹³ O SEGNER, lev twa! Dibout divan zot, ranvers zot! Servi to lepe kont move dimounn pou sap mo lavi.

¹⁴ Protez mwa kont sa kalite dimounn la, ki rasazie ar ramas dibien olie fer lebien; fer ki zot zanfan ek ti zanfan ranpli zot vant ziska zot rasazie.

¹⁵ Mwa, akoz lazistis, mo pou trouv twa divan mwa; e kan soley leve, to prezans ranpli mwa ar lazwa.