Psom 16 - Nouvo Testaman Kreol Morisien Harmonisation NTPS KM

Mo lafwa li dan twa, Bondie

Enn poem David.

¹ Protez mwa, Bondie; tomem mo sekirite.

² Mo dir LESEGNER, “Tomem mo Segner; mo pena pli gran boner ki twa.”

³ Dan sa pei la, bann ki swiv Bondie zot nob ek bon! Mo ena afeksion pou bann dimounn koumsa.

⁴ Bann ki galoup deryer lot bondie, zot pou miltipliye zot traka; Mo pa pou partisip dan zot sakrifis disan; mo refiz pronons zot nom.

⁵ SEGNER, tomem mo pli gran partaz, mo destin; mo lavenir an sekirite dan to lame.

⁶ Kado to donn mwa parey enn terin manifik; li enn par ki fer mwa gran plezir.

⁷ Mo loue LESEGNER parski li konsey mwa; mem aswar mo leker averti mwa.

⁸ LESEGNER li touletan dan mo lespri; li touletan la koste ar mwa, mo pa pou konn defet.

⁹ Akoz tousa mo leker ranpli ar gratitid ek boner e mo viv dan lape ek sekirite.

¹⁰ To pa abandonn mwa dan lamor. To pa les lamor aval to fidel.

¹¹ To touletan montre mwa bon sime lavi; kan to la, mo lavi ranpli ar lazwa; dan to prezans ena boner pou touzour.