Psom 147 - Nouvo Testaman Kreol Morisien Harmonisation NTPS KM

Laglwar Bondie Toupwisan

¹ Alelouya! Ala li zoli la kan nou sant louanz nou Bondie; li pa zis zoli, li merite ki nou sant enn kantik louanz.

² LESEGNER pe donn Zerizalem enn nouvo lavi; bann exile Izrael pe retourn zot lakaz.

³ Li geri zot leker brize, li met pansman lor zot blesir.

⁴ Li finn deside komie zetwal pou ena dan lesiel, e anplis, li finn donn sak zetwal enn nom.

⁵ LESEGNER li gran ek pwisan; so sazes pena limit.

⁶ Li relev bann feb ki finn kraze; me li zet bann move dimounn anba dan lapousier.

⁷ Anou sant kantik pou loue LESEGNER; nou akonpagn nou sante ar sitar klasik.

⁸ Li fann niaz partou dan lesiel; li prepar lapli pou aroz later e li fer lerb pouse partou.

⁹ Li donn tou zanimo manze; li fer parey pou ti korbo kan zot reklam nouritir.

¹⁰ Li pa donn gran valer lafors enn seval, e li pena okenn lintere dan vites enn atlet.

¹¹ Li prefer bann ki onor li, bann ki fer konfians so lamour infini.

¹² Glorifie LESEGNER, O Zerizalem! Loue to Bondie, O Sion!

¹³ Li ranforsi sekirite bann laport lantouraz lavil; li beni pep ki viv dan lavil-la.

¹⁴ Li vey sekirite frontier pei pou ki ena lape, e li donn lasirans enn bon rekolt.

¹⁵ Li avoy so lord lor later e so parol toutswit galoup ver so destinasion.

¹⁶ Limem ki fann lanez kouma enn tapi e aroz glason rape partou parey kouma lasann.

¹⁷ Li fer lagrel grene kouma gravie; kisann-la kapav tini kont sa freser-la?

¹⁸ Li donn lord e lanez fonn; li avoy divan e dilo koule partou.

¹⁹ Li fer Zakob konn so parol, li dikte so regleman e donn so komannman lepep Izrael.

²⁰ Li pa finn azir parey koumsa anver lezot nasion; bann-la pa konn lalwa Bondie. Alelouya, nou loue LESEGNER!