Psom 146 - Nouvo Testaman Kreol Morisien Harmonisation NTPS KM

Louanz pou Bondie nou Sover

¹ Alelouya! Nou loue LESEGNER!

² Mo pou sant louanz LESEGNER tanki mo ena lavi; mo pou loue mo Bondie ziska lafin mo lavi.

³ Pa fer konfians bann dirizan imin; imin pa ena pouvwar pou sov nou.

⁴ Kan zot mor, zot vinn lapousier; sa zour-la tou zot plan mor ansam ar zot.

⁵ Bienere dimounn ki trouv sekour dan Bondie ki Zakob ti priye; ki met tou lespwar dan LESEGNER so Bondie,

⁶ ki finn kree lesiel ek later, lamer e tou seki zot kontenir, ki gard so promes avek fidelite,

⁷ ki fer lazistis an faver bann oprime e li nouri tou bann kreatir ki gagn fin. LESEGNER liber bann prizonie,

⁸ LESEGNER fer aveg trouv kler. LESEGNER ed seki finn tonbe pou re-diboute; LESEGNER kontan dimounn ki swiv bon sime.

⁹ LESEGNER protez bann imigran ki viv dan nou pei; li relev bann vev ek orfelin me li fer plan bann azan lemal fini an-rwinn.

¹⁰ LESEGNER pou regne pou touzour, O Sion, to Bondie pou regne eternelman. Alelouya, nou loue nou SEGNER!