Psom 145 - Nouvo Testaman Kreol Morisien Harmonisation NTPS KM

Nou sant kantik louanz

Enn Psom David. Enn kantik louanz.

¹ Mo pou proklam to grander O Bondie, mo Lerwa; mo pou loue twa aster, pli divan, touletan.

² Toulezour mo pou dir twa mersi; mo pou sant to louanz aster, pli divan, touletan.

³ LESEGNER li gran, li merit tou louanz; nou pa kapav konpran ni mezir so grander.

⁴ Zenerasion apre zenerasion limanite pou loue to bann aksion; partou zot pou koz lor to bann explwa,

⁵ lor splander to laglwar ek to mazeste. Mo pou medit lor bann gran mervey ki to fer.

⁶ Dimounn pou koz lor to pwisans redoutab, e mwa mo pou proklam to bann explwa.

⁷ Zot pou selebre grander to bonte; ar lazwa zot pou sant to lazistis.

⁸ Leker LESEGNER li ranpli ar tandres ek konpasion; difisil pou li fer koler parski so lamour infini deborde partou.

⁹ LESEGNER ena labonte pou tou dimounn, li ena konpasion pou tou kreatir ki li finn kree.

¹⁰ SEGNER, tou seki to finn kree pou dir twa mersi, e tou bann fidel pou loue twa.

¹¹ Zot pou koz lor laglwar to rwayom, e zot pou rakont tou bann mirak ki to finn fer.

¹² Koumsa lemond antie pou konn to explwa ek laglwar manifik ki to regn ena.

¹³ To regn pou enn regn eternel e to pouvwar rwayal pou dire pou touzour. LESEGNER fidel dan tou so parol, dan tou so aksion li montre so bonte.

¹⁴ LESEGNER soutenir bann ki pe tonbe e li relev bann ki kourbe.

¹⁵ Zot tou lev zot lizie ver twa pou gagn zot nouritir kan zot bizin.

¹⁶ To ouver to lame e tou kreatir rasazie e satisfe.

¹⁷ LESEGNER, li zis dan tou seki li fer; li zenere dan tou so aksion.

¹⁸ LESEGNER pre pou ed dimounn ki apel li e ki dimann so led ar sinserite.

¹⁹ Bann ki onor li gagn seki zot bizin; li tann zot soufrans e li sov zot.

²⁰ Li vey lor bann ki kontan li me li detrir bann azan lemal.

²¹ Mo pou touletan loue LESEGNER; tou kreatir ki li finn kree pou loue so sin nom aster, taler, pli divan ek touletan.