Psom 143 - Nouvo Testaman Kreol Morisien Harmonisation NTPS KM

Ekout mo lapriyer, Segner

Enn Psom David.

¹ SEGNER, ekout mo lapriyer! Dan to fidelite ekout mo siplikasion; dan to drwatir reponn mwa.

² Pa fer enn prose kont mwa, to serviter, parski okenn dimounn lor later san repros devan twa.

³ Mo lennmi finn pourswiv mwa, finn zet mwa anba, finn kraz mwa. Mo lennmi finn anfons mwa dan lobskirite parey dimounn ki finn mor lontan.

⁴ Mo pe bes lebra; dezespwar pe touf mwa net.

⁵ Mo rapel bien lepase; mo rapel bien to bann explwa extraordiner; mo medit lor louvraz to lame.

⁶ Mo lev lame lao ver twa, dan lapriyer, mo lekor ek mo lespri swaf to prezans parey kouma later desese swaf dilo lapli.

⁷ Exos mo lapriyer, SEGNER! Mo finn perdi lespwar. Pa get lot kote, SEGNER; si to pa pran mwa kont, mo pou fini dan trou lamor.

⁸ Toule gramatin fer mwa konn to lamour infini parski mo finn met mo konfians dan twa. Montre mwa sime ki mo bizin swiv parski mo finn tourn mwa ver twa.

⁹ SEGNER, mo vinn ver twa pou gagn to proteksion; protez mwa kont mo lennmi.

¹⁰ Montre mwa sime to volonte parski tomem mo Bondie. Ki to lespri gid mwa avek bonte lor sime ki pena obstak.

¹¹ Prezerv mo lavi, SEGNER, pou loner to nom; par to lazistis tir mwa dan mo tourman.

¹² Parski to kontan mwa, detrir mo lennmi e detrir mo bann adverser, akoz mo to serviter.