Psom 141 - Nouvo Testaman Kreol Morisien Harmonisation NTPS KM

Lapriyer Tanto

Enn Psom David.

¹ Mo sipliy twa, SEGNER; mo bien bizin to led. Pran mwa kont ler mo rod to led.

² Aksepte mo lapriyer kouma lafime lansan; aksepte mo lame ki leve ver twa parey lofrand aswar.

³ SEGNER, met enn gard kot mo labous, enn santinel ant mo de lalev.

⁴ Ed mwa pou reziste tantasion lemal, pou pa pran par dan move pratik ansam ar move dimounn; alor mo pa pou partisip dan zot fet.

⁵ Enn bon dimounn kapav pini mwa, fer mwa repros pou mo prop dibien me mo refiz aksepte faver ar move dimounn parski gramatin-tanto mo fer lapriyer kont zot pese.

⁶ Kan zot bann dirizan pe tom piktet dan presipis, dimounn pou rapel laverite ki mo ti pe dir.

⁷ Parey kouma bisron koup dibwa, fann li, tay-tay li; koumsa mem zot lezo pou fane bout par bout toutotour zot tom vid.

⁸ Me mwa mo lizie fixe lor twa, SEGNER. Donn mwa to proteksion e pa les mwa san defans.

⁹ Protez mwa kont bann latrap zot finn poz lor mo sime; anpes mwa rant dan piez bann ki pratik lemal.

¹⁰ Fer zot rant dan zot prop latrap letan ki mwa mo travers an liberte.