Psom 140 - Nouvo Testaman Kreol Morisien Harmonisation NTPS KM

Protez mwa Segner Bondie

Pou sef koral. Enn Psom David.

¹ SEGNER, protez mwa kont bann azan lemal; anpes bann dimounn violan fer mwa ditor.

² Zot nek konplote pou fer lemal e zot touzour pe lev lager.

³ Zot lalang ena venin kouma serpan; zot parol sarye pwazon koumadir kobra.

⁴ Protez mwa, SEGNER, kont pouvwar lemal; anpes dimounn violan detrir mwa, bann ki rod met mwa lak.

⁵ Bann dimounn fezer finn instal latrap pou mwa; ar lakord zot finn tal enn file pou may mwa; zot finn met piez partou lor mo sime.

⁶ Mo dir LESEGNER, “Tomem mo Bondie!” Ekout mo lapriyer, SEGNER, mo pe sipliye!

⁷ Twa SEGNER, mo Segner, lafors ki sov mwa, to finn protez mo latet pandan konba.

⁸ SEGNER, pa sede devan dezir bann azan lemal; pa les zot reisi zot proze, sinon zot pou drese dan larogans.

⁹ Pa les mo bann lennmi gagn laviktwar; fer zot move lespri detrir zot prop lavi.

¹⁰ Fer labrez tom lor zot; fer zot tom dan trou nwar kot pena sime sorti.

¹¹ Anpes bann foser ek manter etabli zotmem dan pei; fer ki maler pourswiv zot san arete.

¹² Mo kone ki LESEGNER pran par bann pov; li defann drwa bann ki bizin so led.

¹³ Bann ki viv dan ladrwatir pou sant to laglwar; zot pou touletan viv dan to prezans.