Psom 14 - Nouvo Testaman Kreol Morisien Harmonisation NTPS KM

Mesanste partou

Enn Psom David, dan repertwar sef koral.

¹ Bann inbesil panse dan zot leker, “Pou mwa, pena Bondie!” Zot koronpi; zot fer bann krim orib; pena enn osi ki fer dibien.

² LESEGNER depi lesiel lao pe obzerv limanite anba pou gete si ena dimounn ki posed lasazes; si ena dimounn ki pe rod ador Bondie.

³ Me zot tou finn perdi sime; zot tou zot dan koripsion. Pena enn sel ki mars dapre drwatir, mem pa enn sel.

⁴ Bann ki fer lemal, zot pa konpran? Zot devor mo bann fidel kouma zot devor manze, e zot pa invok nom LESEGNER?

⁵ Me biento zot pou tranble ar freyer parski Bondie li avek seki obeir li.

⁶ Bann move dimounn, zot rod devir plan ti-dimounn pov me zot bliye ki LESEGNER limem protekter bann pov.

⁷ Mo priye ki liberasion Izrael pou vinn depi oter Sion. Desandan Zakob, lepep Izrael pou dan gran lazwa kan LESEGNER fer zot retrouv zot dibien.