Psom 138 - Nouvo Testaman Kreol Morisien Harmonisation NTPS KM

Gran mersi Segner Bondie

Enn Psom David.

¹ Mo remersie twa SEGNER ar tou mo leker; mo sant to louanz divan lezot bondie.

² Mo fer fas to Tanp sakre, mo azenou e mo loue to nom pou to lamour infini e to fidelite parski to finn prouve ki to nom ek to lalwa zot pli ot e pli gran ki tou.

³ Kan mo finn dimann to led, to finn reponn; to finn ranpli mwa ar kouraz ek lafors.

⁴ SEGNER, tou bann lerwa dan lemond loue twa parski zot tann parol to labous.

⁵ Zot tou pou sant to bann explwa parski to laglwar li bien-bien gran.

⁶ Mem to lao laba dan lesiel, to okip bann ti-dimounn anba e bann vantar to rekonet zot depi lwin.

⁷ Si mo mars dan ladetres, to fer mwa reviv. To protez mwa kont lennmi redoutab e to pouvwar sov mwa.

⁸ LESEGNER pou onor tou promes li finn fer pou mwa; SEGNER, to lamour infini li eternel. Kontign zoli travay ki to finn koumanse.