Psom 137 - Nouvo Testaman Kreol Morisien Harmonisation NTPS KM

Dan bor larivier Babilonn

¹ Dan bor bann larivier Babilonn nou ti asize; nou larm ti koule ler nou ti rapel Sion.

² Lor pie pepliye dan bor dilo nou ti anpandan nou linstriman lamizik.

³ Nou lennmi konkeran demann nou sante. Nou persekiter demann enn kantik zwaye. Zot dir, “Sant enn sante ki sorti Sion.”

⁴ Kouma kapav sant enn sante pou LESEGNER kan nou dan pei etranze?

⁵ Si zame mo bliye twa Zerizalem, prefer mo lame bliye kouma zwe lamizik.

⁶ Si ena pou bliye twa, si mo nepli konsider twa lasours mo boner, prefer mo lalang amare e mo aret sante.

⁷ Rapel, SEGNER, ki bann Edomit ti fer zour ki Babilonien ti kaptir Zerizalem. Pa bliye ki zot ti pe dir, “Kraz partou! Met tou plat!”

⁸ Zour destriksion Babilonn pou vini. Bienere sa dimounn ki pou fer ar zot seki zot ti fer ar nou:

⁹ trap ti-baba pou kraz zot lor ros.