Psom 136 - Nouvo Testaman Kreol Morisien Harmonisation NTPS KM

Mersi Segner Bondie

¹ Nou remersie LESEGNER parski li bon; so lamour infini li eternel.

² Nou remersie Bondie ki pli gran ki tou bondie; so lamour infini li eternel.

³ Nou remersie Lesegner, pli pwisan ki tou segner; so lamour infini li eternel.

⁴ Zis li tousel ki kapav fer bann gran mirak; so lamour infini li eternel.

⁵ Ar so sazes li ti konstrir lesiel; so lamour infini li eternel.

⁶ Li ti kree later lor losean profon; so lamour infini li eternel.

⁷ Li ti kree soley ek lalinn; so lamour infini li eternel.

⁸ Soley pou gouverne lizour; so lamour infini li eternel.

⁹ Lalinn ek zetwal pou gouverne aswar; so lamour infini li eternel.

¹⁰ Dan Lezip li ti touy tou bann garson premie ne; so lamour infini li eternel.

¹¹ Li ti gid pep Izrael pou zot sorti depi Lezip; so lamour infini li eternel.

¹² So lame pwisan, so lebra solid; so lamour infini li eternel.

¹³ Li fer dilo Lamer Rouz separ an de; so lamour infini li eternel.

¹⁴ Li ti gid so pep pou travers lamer; so lamour infini li eternel.

¹⁵ Li ti nway lerwa Lezip ek so larme; so lamour infini li eternel.

¹⁶ Li ti gid so pep atraver dezer; so lamour infini li eternel.

¹⁷ Li ti detrir bann lerwa pwisan; so lamour infini li eternel.

¹⁸ Li ti ranvers bann gran-gran lerwa; so lamour infini li eternel.

¹⁹ Sihon, lerwa Amorit; so lamour infini li eternel.

²⁰ Og, lerwa Basann; so lamour infini li eternel.

²¹ Li ti pran zot later e li donn sa so pep; so lamour infini li eternel.

²² Li ti donn tousala Izrael, so serviter; so lamour infini li eternel.

²³ Kan nou ti imilie, li pa ti abandonn nou; so lamour infini li eternel.

²⁴ Li ti tir nou dan prizon nou lennmi; so lamour infini li eternel.

²⁵ Li donn manze tou bann kreatir vivan; so lamour infini li eternel.

²⁶ Nou remersie Bondie ki Souvrin dan lesiel, so lamour infini li eternel.