Psom 135 - Nouvo Testaman Kreol Morisien Harmonisation NTPS KM

Lesegner Bondie, tomem pli gran

¹ Alelouya! Loue nom LESEGNER! Zot tou, serviter LESEGNER, sant so louanz,

² zot ki debout dan lakaz LESEGNER, dan lakour Tanp nou Bondie.

³ Nou selebre LESEGNER parski li bon; nou sant louanz LESEGNER parski li zenere.

⁴ Li ti swazir Zakob pou limem; pep Izrael kouma so prop trezor.

⁵ Mo kone ki LESEGNER li gran; pli gran ki tou lezot bondie.

⁶ Li kapav fer tou seki li anvi dan lesiel ek lor later, lor lamer ek dan profonder losean.

⁷ Li ris niaz siklonn depi finfon later; li lans zekler pou alim tanpet lapli; li larg rafal depi so prop rezerv.

⁸ Dan Lezip li ti touy bann premie ne, premie ne dimounn kouma zanimo.

⁹ Laba li ti fer mirak ek prodiz kont Faraon ek so bann minis.

¹⁰ Li ti detrir plizier nasion e li ti touy plizier lerwa pwisan:

¹¹ Sihon, lerwa Amorit, Og, lerwa Basann, e tou bann lerwa dan Kanaan.

¹² Li ti pran zot later pou li donn so pep, ti donn posesion zot later lepep Izrael.

¹³ SEGNER, to pou renome pou touletan; zenerasion apre zenerasion nou pou rapel sa.

¹⁴ LESEGNER pou fer lazistis pou so pep; li pou ena konpasion pou so bann serviter.

¹⁵ Bann tribi priye bann idol fabrike ar lor ek larzan; lame imin ki donn zot form.

¹⁶ Zot ena labous me zot pa kapav koze; zot ena lizie me zot pa trouv kler.

¹⁷ Zot ena zorey me zot pa tande; zot mem pa ena lesouf ki sorti dan zot labous.

¹⁸ Bann artizan ki fabrik idol, bann ki finn met zot konfians dan idol, pou vinn parey kouma zot.

¹⁹ Anou loue LESEGNER, pep Izrael! Loue li, zot ki bann pret Bondie!

²⁰ Zot bann Levit, loue LESEGNER; zot ki ador li, sant so grander!

²¹ Loue LESEGNER ki lor montagn Sion, lamem kot li reste, dan Zerizalem. Alelouya, nou sant louanz LESEGNER!