Psom 132 - Nouvo Testaman Kreol Morisien Harmonisation NTPS KM

Kouma nou bien dan lakaz Bondie

Enn kantik pou pelerinaz.

¹ SEGNER, pa bliye David; pa bliye komie li ti soufer.

² Li ti fer enn serman devan LESEGNER, li ti fer enn promes Bondie Toupwisan ki Zakob adore,

³ “Mo pa pou retourn mo lakaz mo pa pou al dormi lor mo lili;

⁴ mo pa pou les mo lizie ferme ar somey, ni mo popier repoze pou dormi,

⁵ tanki mo pa finn gagn enn plas pou LESEGNER, enn lakaz pou Bondie Toupwisan ki Zakob adore.”

⁶ Dan Betleem nou tann koz Kof ki ti gard Lalians, nou ti retrouv li dan laplenn Yaar.

⁷ Nou ti dir, “Anou al dan lakaz LESEGNER; laba anou fer servis adorasion devan so tronn.”

⁸ Lev twa SEGNER, al dan landrwa ki destine pou to repo, amenn ar twa Kof Lalians, ki montre to gran pouvwar.

⁹ Anvlop to bann pret dan manto lazistis, e ki to pep fidel kriye ar lazwa.

¹⁰ SEGNER, akoz to serviter David, pa abandonn lerwa ki twa to ti swazir.

¹¹ LESEGNER ti fer enn promes ar David, promes ki li pa pou renie: “Enn to bann garson pou vinn lerwa e li pou regne apre twa.

¹² Si to bann garson res fidel ar nou lalians e swiv bann instriksion ki mo done, zot zanfan ek zanfan zot zanfan pou vinn lerwa osi lontan ki lavi existe.”

¹³ LESEGNER finn swazir Sion; samem pou vinn so lakaz:

¹⁴ “Isi ki mo pou viv pou touletan e depi isi mo pou regne; samem mo dezir.

¹⁵ Mo pou beni Sion avek bann resours an abondans; so bann pov pou gagn manze.

¹⁶ Mo pou anvlop so bann pret dan manto delivrans, e so pep fidel pou kriye ek sante dan lazwa.

¹⁷ Enn parmi desandan David pou vinn enn gran lerwa isi; isi mo pou prezerv regn lerwa ki mo finn swazir kouma enn lalanp alime.

¹⁸ Lor so lennmi mo pou poz enn linz laont, me lor so latet pou ena enn kouronn ki briye.”