Psom 130 - Nouvo Testaman Kreol Morisien Harmonisation NTPS KMEd mwa, Segner Bondie Enn kantik pou pelerinaz. 1 Depi profonder mo dezespwar mo kriye twa, SEGNER. 2 O Segner, tann mo lavwa! Ekout mo lapriyer, mo sipliy twa ed mwa! 3 SEGNER, si to ti gard enn lalis tou nou pese, kisann-la ti pou kapav res dan to prezans? 4 Akoz to aksepte pardonn nou, nou dwa twa respe ek reverans. 5 Avek inpasians mo atann led LESEGNER e mo lesperans li dan so parol. 6 Avek inpasians mo pou atann larive Lesegner plis ki gardien-aswar esper gramatin vini. Wi! Plis ki gardien-aswar esper gramatin vini. 7 Izrael, met to lesperans dan LESEGNER! Lamour LESEGNER li infini e li ena gran pouvwar pou sov nou. 8 Limem ki pou liber so pep Izrael depi tou so bann pese. |
Nouvo Testaman Kreol Morisien Harmonisation NTPS KM © Bible Society of Mauritius, 2021.
Bible Society of Mauritius