Psom 126 - Nouvo Testaman Kreol Morisien Harmonisation NTPS KM

Liber nou, Segner Bondie

Enn kantik pou pelerinaz.

¹ Kan LESEGNER ti ramenn nou dan Zerizalem, nou ti krwar nou pe reve.

² Nou labous ti ranpli ar gran riye, nou lalang ti kriye ar lazwa. Ala nou riye la! Nou tann bann lezot nasion dir, “LESEGNER finn fer vremem boukou pou zot.”

³ Wi, LESEGNER ti vremem fer boukou pou nou. Akoz samem nou ti ere koumsa.

⁴ SEGNER, re-donn nou laglwar ki nou ti ena, parey kouma lapli ranpli larivier sek dan Negev.

⁵ Bann ki sem lagrin dan plantasion ar zot larm, pou fer lakoup dan lazwa.

⁶ Bann ki al dan plantasion avek larm, gro sak semans lor ledo, pou retourne lazwa dan leker, pou sante, bon rekolt dan zot panie.