Psom 121 - Nouvo Testaman Kreol Morisien Harmonisation NTPS KM

Bondie, nou protekter

Enn kantik pou pelerinaz.

¹ Mo get lao lor montagn; kot mo sekour pou sorti?

² Sekour pou vinn depi LESEGNER, ki finn kree later ek lesiel.

³ Li pa pou les twa glise, tonbe; to protekter pa pou dormi.

⁴ Protekter Izrael pa kas kou, pa ferm lizie.

⁵ LESEGNER pou vey lor twa; LESEGNER koste ar twa, kouma enn lonbraz ki protez twa.

⁶ Soley pa pou fer twa ditor dan lazourne, ni lalinn pa pou fer twa dimal aswar.

⁷ LESEGNER pou protez twa kont tou danze; li pou prezerv to lavi.

⁸ LESEGNER pou protez twa ler to sorti ek ler to retourne, aster, pli divan ek touletan.