Psom 119 - Nouvo Testaman Kreol Morisien Harmonisation NTPS KM

Lalwa LESEGNER

¹ Bienere bann ki amenn enn lavi san repros, ki viv dapre lalwa LESEGNER.

² Bienere bann ki swiv so instriksion, ki obeir li ar sinserite profon dan zot leker.

³ Zame zot pa fote; zot swiv sime ki li finn trase.

⁴ To finn donn nou to instriksion, nou bizin obeir zot san fot.

⁵ Mo priye ki mo kondir mwa dan enn manier ferm pou ki mo reisi swiv to bann regleman.

⁶ Si mo swiv tou to komannman lerla mo pa pou gagn laont.

⁷ Ler mo konn apresie valer to regleman ki zis, mo pou rann glwar to grander ar sinserite.

⁸ Mo pou obeir to lalwa; zame pa abandonn mwa.

⁹ Ki manier enn zennom kapav res prop dan lavi? Li bizin obeir to lansegnman.

¹⁰ Ar tou mo leker mo rod twa; anpes mwa dezobeir to komannman.

¹¹ Mo prezerv to parol dan mo leker pou mo pa fer pese kont twa.

¹² Mo sant to louanz O SEGNER; montre mwa to regleman.

¹³ Mwa mo pou repete for-for tou bann desizion ki to finn donn nou.

¹⁴ Mo ena boukou lazwa kan mo obeir to komannman plis ki lazwa ki enn dimounn ena ki posed enn rises enorm.

¹⁵ Mo etidie to bann instriksion e fixe mo regar lor sime ki to montre mwa.

¹⁶ To bann lalwa donn mwa satisfaksion; to parol finn grave dan mo memwar.

¹⁷ Pran mwa, to serviter, bien kont pou ed mwa viv enn lavi ki obeir to parol.

¹⁸ Ouver mo lizie pou ki mo dekouver bann laverite merveye ki kasiet dan to bann lalwa.

¹⁹ Mo sezour lor later li kourt; pa kasiet mwa to bann komannman.

²⁰ Sak moman mo leker brile ar inpasians pou to bann instriksion.

²¹ To repros bann ki fer zot fanor, bann modi ki dezobeir to instriksion.

²² Protez mwa kont zot mepri ek zot insilt parski mwa mo respekte to lord.

²³ Bann dirizan zwenn pou konplote kont mwa me mwa mo prefer etidie to lansegnman.

²⁴ To leson donn mwa plezir; zot bann konseye ki ouver mo lespri.

²⁵ Mo mo anba dan lapousier; selon to parol, fer mwa reviv.

²⁶ Mo ti konfes seki mo finn fer, mo bann erer e to ti reponn mwa; montre mwa to regleman.

²⁷ Ed mwa pou konpran to bann exizans, e mo pou medit lor to bann aksion manifik.

²⁸ Sagrin pe pins mo leker; donn mwa lafors dapre to parol.

²⁹ Anpes mwa pran move sime e dan to bonte, ansegn mwa to lalwa.

³⁰ Mo swazir pou swiv twa avek fidelite; mo pran bien kont sazes to zizman.

³¹ Mo finn aprann to lansegnman O SEGNER, pa fer mwa gagn laont.

³² Mo swiv sime to komannman ar boukou lazwa parski to fer mo konesans grandi.

³³ SEGNER, montre mwa lespri to regleman e mo promet mo pou obeir zot touletan.

³⁴ Fer mwa konpran to lalwa e mo pou swiv li; mo pou grav li dan mo leker.

³⁵ Gard mwa dan lobeisans to bann instriksion parski zot donn mwa boukou boner.

³⁶ Olie fer mwa anvi vinn ris, ranpli mo leker ar dezir pou obeir to lalwa.

³⁷ Pa les mwa tante par zafer san valer; fer mwa viv dan to sime.

³⁸ Onor promes ki to ti fer mwa, to serviter, samem promes ki to fer ar dimounn ki obeir twa.

³⁹ Protez mwa kont insilt ki teroriz mwa; parski sazes to zizman li bon.

⁴⁰ Mo dezir ekout to lord; par to drwatir fer mwa reviv.

⁴¹ SEGNER, montre mwa ki kantite to kontan mwa e sov mwa kouma to ti promet.

⁴² Koumsa mo pou kapav fer fas bann ki insilte mwa parski mo met mo konfians dan to parol.

⁴³ Ed mwa pou koz laverite touletan parski mo lespwar li dan to zizman.

⁴⁴ Mo pou touletan obeir to lalwa aster, pli tar, pou leternite.

⁴⁵ Mo pou viv enn lavi dan parfe liberte parski mo fer tou pou ekout to konsey.

⁴⁶ Mo pou dir bann lerwa ki to instriksion ete e mo pa pou onte pou fer sa.

⁴⁷ Mo santi mwa dan bien kan mo pe obeir to komannman parski mo telman kontan to parol.

⁴⁸ Mo respekte ek kontan to lansegnman e mo pou medit lor to bann exizans.

⁴⁹ Rapel promes ki to ti fer mwa, to serviter; sa ti ranpli mwa ar lespwar.

⁵⁰ Malgre mo soufrans mo ti gagn soulazman parski to promes ti re-donn mwa lavi.

⁵¹ Bann vantar finn bien fer foutan ar mwa me mo pa finn abandonn bann prinsip to lalwa.

⁵² Mo rapel klerman to bann zizman dan lepase parski zot donn mwa kouraz ek lape, O SEGNER.

⁵³ Kan bann ki fer lemal viol to lalwa, lakoler bwi dan mwa.

⁵⁴ Ninport ki kote mo viv kouma enn etranze lor later mo konpoz kantik pou sant to bann lansegnman.

⁵⁵ Mem dan lanwit mo pans twa, SEGNER, e mo pou obeir to lalwa.

⁵⁶ Kan mo pran kont to mesaz lerla ki mo gout veritab boner.

⁵⁷ Mo pa bizin nanye apart twa, O SEGNER; mo fer serman mo pou obeir to parol.

⁵⁸ Mo sipliy twa ar sinserite, montre mwa to bonte kouma to ti promet.

⁵⁹ Mo finn examinn mo konportman e mo pe retourn ver to bann exizans.

⁶⁰ San perdi letan mo swiv to instriksion lor vites.

⁶¹ Malgre bann azan lemal finn instal piez lor mo sime mo pa pou bliye to lalwa.

⁶² Omilie lanwit mo leve pou selebre twa pou to zizman ki drwat.

⁶³ Mo solider ar bann ki ador twa e ki obeir to instriksion.

⁶⁴ SEGNER, liniver ranpli ar to lamour infini; gid mwa atraver to lansegnman.

⁶⁵ To finn onor to parol, SEGNER, e to finn fer dibien pou to serviter.

⁶⁶ Donn mwa sazes ek konesans parski mo fer konfians to komannman.

⁶⁷ Avan to ti imilie mwa, mo ti egare me aster mo gard to parol.

⁶⁸ To bon e to leker li gran! Ansegn mwa to regleman.

⁶⁹ Malgre ki ena dimounn fezer ki finn rakont zistwar lor mwa, mwa ar leker kler mo swiv to instriksion.

⁷⁰ Sa bann-la zot pa konpran nanye; me mwa, mo trouv boukou plezir dan to lalwa.

⁷¹ To pinision finn fer mwa boukou dibien; li finn fer mwa konpran to leson.

⁷² Lalwa ki to prononse, samem meyer pou mwa, li vo plis ki tou bann trezor dan lemond.

⁷³ To ti kree mwa, to finn fasonn mwa; nouri mo lespri pou mo konpran to bann komannman.

⁷⁴ Bann ki respekte twa pou kontan ler zot trouv mwa parski mo finn met mo lesperans dan to parol.

⁷⁵ Mo kone ki to bann zizman zot baze lor drwatir, SEGNER, e to ti ena rezon pou imilie mwa dan to fidelite.

⁷⁶ Konsol mwa ar to lamour infini, kouma to finn promet mwa, to serviter.

⁷⁷ Ena pitie pou mwa e mo pou kontigne viv parski mo kontan to lalwa.

⁷⁸ Fer bann gran-nwar dekonserte pou zot bann fos akizasion lor mwa; dan mo kote, mo pou medit lor to bann instriksion.

⁷⁹ Fer bann ki respekte twa vinn ver mwa pou ki zot konn to bann lord.

⁸⁰ Ed mwa pou respekte to lansegnman kouma bizin pou anpes mwa sibir imiliasion dan defet.

⁸¹ Mo epwize telman mo atann to delivrans, mo finn met mo lespwar dan to parol.

⁸² Mo lizie pe trouv som telman mo atann to promes; mo dir momem, “Kan to pou konsol mwa?”

⁸³ Mo santi mwa initil koumadir mo enn touk perse; pourtan zame mo pa finn bliye to bann lansegnman.

⁸⁴ Komie letan mo pou bizin atann? Kan to pou pini bann ki persekit mwa?

⁸⁵ Bann gran-nwar ki pa respekte to lalwa finn plas bann piez partou lor mo sime.

⁸⁶ To bann instriksion ranpli ar laverite. Mo lennmi pe persekit mwa san okenn rezon; ed mwa!

⁸⁷ Bann-la ti pre pou fini mwa, mo manke trouv lamor, me mo pa finn abandonn to lansegnman.

⁸⁸ Ar to lamour infini, prezerv mo lavi, pou ki mo kapav obeir lord ki to done.

⁸⁹ To parol, O SEGNER, li eternel li fixe pou touletan dan lesiel.

⁹⁰ To fidelite li dire zenerasion apre zenerasion; to finn met later dan so plas e li res stab.

⁹¹ Par to lord tou kiksoz finn tini ziska zordi, e kouma bon serviter, zot ekout twa.

⁹² Si to lalwa pa ti lasours mo lazwa depi lontan mo douler ti pou fini touy mwa.

⁹³ Zame mo pou inior to bann instriksion parski gras-a zot mo ankor vivan.

⁹⁴ Mo lavi dan to lame! Sov mwa! Mo finn touletan fer tou pou respekte to instriksion.

⁹⁵ Bann ki pratik lemal pe veye pou touy mwa me mwa mo pou kontigne medit lor to ansegnman.

⁹⁶ Mo kone ki mem kiksoz parfe ena so limit me to komannman li pena limit.

⁹⁷ O komie mo kontan to lalwa! Lanwit-lizour mo medit lor to lalwa.

⁹⁸ To komannman grave dan mo latet; akoz sa mo ena plis sazes ki mo lennmi.

⁹⁹ Parfwa mo konpran plis ki profeser parski mo touletan pe medit lor to lansegnman.

¹⁰⁰ Mo lespri pli for ki lespri bann gran-dimounn parski mwa mo obeir to instriksion.

¹⁰¹ Mo finn evit konportman malsin parski mo krwar dan to parol.

¹⁰² Mo pa finn bliye okenn to bann regleman parski twa ki mo profeser.

¹⁰³ To parol zot extra dou, pli dou ki dimiel.

¹⁰⁴ To instriksion fer mwa vinn saz akoz sa mo deteste move konportman.

¹⁰⁵ To lalwa li enn lalanp ki ekler mo sime; enn far ki diriz mwa dan marenwar.

¹⁰⁶ Mo fer serman mo pou onor mo promes pou obeir to bann instriksion ki baze lor drwatir.

¹⁰⁷ Mo douler, SEGNER, li atros; re-donn mwa lavi selon to parol.

¹⁰⁸ Aksepte mo lapriyer aksiondegras, SEGNER, e ansegn mwa to bann leson.

¹⁰⁹ Mo touletan pe pran risk ar mo lavi me zame mo pa finn bliye to lalwa.

¹¹⁰ Bann ki pratik lemal ti met piez partou lor mo larout; malgre sa mo ti refiz dezobeir to lansegnman.

¹¹¹ To bann exizans finn grave dan mo lespri pou leternite; zotmem ki met lazwa dan mo leker.

¹¹² Mo pou kontigne obeir to volonte pou touzour, ziska lafin net.

¹¹³ Mo deteste bann ki ezite pou swiv twa me mwa, mo kontan to lalwa.

¹¹⁴ Tomem mo protekter, mo sover; mo fer konfians to parol.

¹¹⁵ Sort divan mwa ale, zot tou serviter lemal! Mwa mo respekte komannman mo Bondie.

¹¹⁶ Donn mwa lafors kouma to ti promet pou ki mo viv; pa desevwar mo lesperans.

¹¹⁷ Ar to soutien mo pou an sekirite e mo pou kontigne met to bann instriksion an pratik.

¹¹⁸ To kondann bann ki dezobeir to instriksion parski bann plan fos ki zot fer pa servi nanye.

¹¹⁹ To tret bann move dimounn lor later kouma salte akoz sa mo kontan to bann regleman.

¹²⁰ Mo rekonet ki mo per twa, mo mem gagn frison; e mo gagn per to bann zizman.

¹²¹ Mo finn fer tou seki mo krwar bon ek korek; pa abandonn mwa dan grif bann opreser.

¹²² Promet mwa ki to pou ed to serviter; pa les bann gran-nwar fer dominer ar mwa.

¹²³ Mo lizie ki res ouver, zot fatige rod to sekour; zot kontign rod delivrans ki to promet.

¹²⁴ Donn mwa zis seki to lamour infini komande e ansegn mwa to bann regleman.

¹²⁵ Mwa mo zis to serviter; ekler mo lespri pou mo aprann ek konpran to lansegnman.

¹²⁶ SEGNER, finn ler pou to azir, parski dimounn pe dezobeir to lalwa.

¹²⁷ Mo vreman kontan to komannman plis ki lor, plis ki lor pli fin ki ena.

¹²⁸ Alor san ezite mo swiv tou to bann instriksion e mo deteste larout mansonz.

¹²⁹ Tou to bann lansegnman zot merveye; alor ar tou mo leker mo met zot an pratik.

¹³⁰ Kan dimounn dekouver to parol sa li ekler zot lavi e bann inioran trouv lizour.

¹³¹ Telman mo anvi bwar to bann komannman ki mo labous res gran ouver.

¹³² Vinn ed mwa, akord mwa to lagras, kouma to fer ar tou dimounn ki kontan twa.

¹³³ Dapre to parol, diriz mo pa pou mo pa tonbe; pa les lemal devir mo lavi.

¹³⁴ Tir mwa dan latrap opreser pou ki mo lib pou obeir to instriksion.

¹³⁵ Fer lalimier to prezans briy lor mwa, to serviter, e ansegn mwa to regleman.

¹³⁶ Mo larm koule kouma robine kan mo trouv dimounn dezobeir to lalwa.

¹³⁷ SEGNER, tomem lasours drwatir e to lalwa li zis.

¹³⁸ To bann instriksion zot baze lor drwatir ek lazistis, zot ranpli ar fidelite.

¹³⁹ Lakoler anflam mo lespri akoz mo lennmi bliye to parol.

¹⁴⁰ To promes finn pas tou leprev. Sa mo lavi sa, mo pli gran trezor!

¹⁴¹ Mem si mo pa inportan e lezot mepriz mwa zame mo tourn ledo ar to lansegnman.

¹⁴² To drwatir li eternel e to lalwa li laverite pou touletan.

¹⁴³ Traka ek tourman trangle mo lexistans me to lalwa ranpli mo leker ar lazwa.

¹⁴⁴ To bann instriksion zot drwat pou leternite; ekler mo lespri, koumsa mo kapav viv.

¹⁴⁵ Ar sinserite mo dimann to led; reponn mwa SEGNER e mo pou fer tou seki to regleman dir.

¹⁴⁶ Mo sipliy twa: sov mwa, e mo pou respekte to bann lord.

¹⁴⁷ Avan soley leve, mo priye twa pou dimann to led; mo lespwar repoz lor to parol.

¹⁴⁸ Aswar mo pa dormi pou mo kapav medite, mo medit lor tou to bann lansegnman.

¹⁴⁹ O SEGNER, akoz to lamour infini, ekout mo lapriyer; e protez mo lavi, dapre to desizion.

¹⁵⁰ Bann ki persekit mwa avek kriote, zot pe raprose, sa bann-la zot bien lwin ar to lalwa.

¹⁵¹ Me twa SEGNER, to la koste ar mwa e to komannman li vre pou touletan.

¹⁵² Bien-bien lontan, mo ti aprann ki to bann instriksion to finn etablir zot pou leternite.

¹⁵³ Pran kont mo douler e sov mwa parski zame mo finn bliye to lalwa.

¹⁵⁴ Pran mo par e liber mwa; sov mwa kouma to finn promet.

¹⁵⁵ Bann ki pratik lemal pa pou gagn delivrans parski zot pa rod to bann regleman.

¹⁵⁶ Me twa, SEGNER, to konpasion li infini; atraver to zizman prezerv mo lavi.

¹⁵⁷ Mo ena boukou lennmi e boukou persekiter, me zame mo finn abandonn to regleman.

¹⁵⁸ Kan mo get sa bann tret-la mo gagn maloker parski zot pa respekte to instriksion.

¹⁵⁹ Get mwa kouma mo kontan to lansegnman. Parski to lamour li infini, prezerv mo lavi.

¹⁶⁰ Laverite samem leker to parol, e to bann zizman ki drwat, zot pou reste pou leternite.

¹⁶¹ Bann dimounn pwisan pe atak mwa pou nanye, mwa mo ena gran respe pou to parol.

¹⁶² To parol donn mwa gran lazwa kouma kikenn ki finn dekouver enn gran trezor.

¹⁶³ Mo ayir ek deteste mansonz, me mo kontan to lalwa.

¹⁶⁴ Set fwa par zour mo loue twa pou to bann bon zizman baze lor lazistis.

¹⁶⁵ Bann ki kontan to lalwa zot viv dan lape e nanye pa kapav fer zot tonbe.

¹⁶⁶ Mo pe atann ki to sov mwa SEGNER, e mo akonplir to bann komannman.

¹⁶⁷ Mo obeir to lansegnman ki mo kontan ar enn lamour sinser.

¹⁶⁸ Mo obeir to leson ek to instriksion; to lizie trouv tou seki mo fer.

¹⁶⁹ SEGNER, les mo lapriyer rant dan to prezans; ekler mo lespri dapre to parol.

¹⁷⁰ Aksepte mo siplikasion vinn dan to prezans e sov mwa kouma to ti promet.

¹⁷¹ Mo pou sant to louanz parski to ansegn mwa to regleman.

¹⁷² Mo pou sant to promes parski to bann komannman li vre ek drwat.

¹⁷³ Res touletan la pou ed mwa parski mwa mo touletan pe swiv to lord.

¹⁷⁴ Mo gran dezir se ki to sov mwa, O SEGNER, e se to lalwa ki lasours mo boner.

¹⁷⁵ Protez mo lavi pou ki mo kapav kontigne sant to grander e ed mwa ar to bann instriksion.

¹⁷⁶ Mo finn egare kouma enn brebi ki finn perdi sime; vinn sers mwa, to serviter; zame mo finn bliye to bann komannman.