Psom 116 - Nouvo Testaman Kreol Morisien Harmonisation NTPS KM

Lapriyer enn dimounn ki finn sap dan lamor

¹ Mo kontan LESEGNER parski li finn tann mo lapriyer ek mo siplikasion.

² Li ekout mwa avek atansion mo pou invok li osi lontan ki mo viv.

³ Lamor ti pe fer mo letour pou anvlop mwa; tom ti pe ouver an gran pou aval mwa. Traka ek lafreyer ti pe sezi mwa par lagorz.

⁴ Alor mo kriye LESEGNER par so nom, “SEGNER, sov mwa, SEGNER!”

⁵ LESEGNER li bon ek zenere; Bondie ranpli ar konpasion.

⁶ LESEGNER protez dimounn feb; kan mo ti tom bien ba, li ti sov mwa.

⁷ Mo lespri trankil, mo retrouv mo repo, parski LESEGNER finn fer dibien pou mwa.

⁸ To ti sov mwa, anpes lamor kokin mwa ale; to ti souy mo larm, to ti anpes mo lipie kogne,

⁹ pou ki mo mars dan prezans LESEGNER dan lemond bann vivan.

¹⁰ Mo lafwa ti res ferm mem kan mo ti dir, “Mo finn fini net, aster!”

¹¹ Mo ti telman boulverse mo ti dir, “Bann imin, zot tou manter.”

¹² Ki bon kiksoz mo kapav donn LESEGNER pou remersie li pou tou so bienfe?

¹³ Mo pou prezant enn lofrand divin, dan koup delivrans e mo apel LESEGNER par so nom pou dir mersi.

¹⁴ Dan lasanble kot so pep reini mo pou onor tou mo bann promes anver LESEGNER.

¹⁵ LESEGNER resanti douler, kan so bann fidel mor.

¹⁶ Mwa mo to serviter, SEGNER; mo servi twa parey kouma mo mama ti fer. To finn kas lasenn ki ti atas mwa.

¹⁷ Mo pou ofer enn sakrifis remersiman, mo apel LESEGNER par so nom pou dir li mersi.

¹⁸ Dan lasanble kot so pep reini mo pou onor tou mo bann promes anver LESEGNER,

¹⁹ dan lakour Tanp LESEGNER omilie Zerizalem. Alelouya, nou sant louanz LESEGNER!