Psom 114 - Nouvo Testaman Kreol Morisien Harmonisation NTPS KM

Enn kantik letan Izrael sorti Lezip

¹ Kan pep Izrael ti kit Lezip, kan desandan Zakob ti kit sa pei etranze la

² Zide ti vinn sanktier Bondie e Izrael ti vinn Bondie so prop propriete.

³ Ler lamer trouv sa, ala li sove! Larivier Zourdin rekile.

⁴ Montagn sot-sote kouma kabri, kolinn sot-sote kouma mouton.

⁵ Ki ti ariv twa lamer pou to sove koumsa? Ki ti ariv twa Zourdin pou to rekile?

⁶ Twa montagn, kifer to ti sot-sote kouma kabri? Twa kolinn, kifer to ti sot-sote kouma mouton?

⁷ Tranble, twa later, dan prezans LESEGNER, dan prezans Bondie ki Zakob adore,

⁸ ki fer ros vinn basin dilo, ki fer granit koule kouma lafontenn.