Psom 111 - Nouvo Testaman Kreol Morisien Harmonisation NTPS KM

Lesegner Bondie li manifik

¹ Alelouya, nou sant louanz LESEGNER! Depi profonder mo leker mo pou dir LESEGNER mersi dan lasanble bann fidel, divan tou dimounn.

² LESEGNER finn fer bann aksion extraordiner; tou dimounn ki admir so bann explwa reflesi lor la.

³ Tou seki Lesegner fer, reyone ar loner ek mazeste. So drwatir li eternel.

⁴ Li pa les nou bliye so bann explwa extraordiner. LESEGNER ranpli ar bonte ek konpasion.

⁵ Li nouri bann ki rekonet so grander; zame li pa renie so lalians.

⁶ Li finn montre so pep ki kalite pwisan so pouvwar ete ler li konfiske later bann infidel pou donn so prop pep.

⁷ Tou seki li fer, gouverne par fidelite ek lazistis; kapav fer konfians so bann instriksion.

⁸ Zot eternel parski zot baze lor laverite ek drwatir.

⁹ Li ti donn so pep liberasion e ti fer enn lalians eternel ar zot. Li vre Bondie, li sin, li redoutab.

¹⁰ Rekonet lotorite LESEGNER samem koumansman lasazes; tou seki pratik sa, montre zot ena bon zizman. Louanz LESEGNER li pou eternel.