Psom 110 - Nouvo Testaman Kreol Morisien Harmonisation NTPS KM

Lesegner ek lerwa ki li finn swazir

Enn Psom David.

¹ LESEGNER Bondie dir mo segner lerwa, “Asiz la, dan mo kote drwat e atann ziska ki mo fer to lennmi azenou divan to lipie.”

² LESEGNER pou fer ou pouvwar rwayal grandi depi Zerizalem ziska lezot landrwa. Inpoz to lalwa ek to pouvwar lor to lennmi.

³ Kan ou desid pou dres kont ou lennmi ou pep pou dibout pou soutenir ou konba. Parey kouma laroze gramatin bann zenes pou vinn ver ou lor montagn sakre.

⁴ LESEGNER ti fer enn serman e li pa pou renie so promes: “Ou pou res so pret pou touletan parey kouma pret Melkisedek.”

⁵ LESEGNER pe asiz dan ou kote drwat; kan so koler pran li, li rakle bann lerwa.

⁶ Li pou ziz bann nasion, e kadav bann lennmi pou tale partou; li kraz bann dirizan partou lor later.

⁷ Nou lerwa pou bwar dilo ki sorti dan lasours; li pou vinn for e li pou relev so latet.