Psom 11 - Nouvo Testaman Kreol Morisien Harmonisation NTPS KM

Mo ena konfians dan twa Segner

Pou sef koral. Enn Psom David.

¹ LESEGNER, limem mo sekirite! Abe kouma to kapav dir mwa, “Anvole kouma zwazo, al kasiet lor montagn

² parski move dimounn pe prepar zot zarm, zot finn plas zot fles dan ark, zot kasiet dan nwar, zot pe viz leker bon dimounn.

³ Kan fondasion lasosiete pe vir anba-lao, dimounn ki viv drwat, ki li kapav fer?”

⁴ LESEGNER li dan so Tanp sakre; LESEGNER so tronn li dan lesiel. Li sirvey tou bann imin partou e li examinn zot.

⁵ LESEGNER teste tou dimounn, so bon kouma so move. Li deteste bann ki servi violans.

⁶ Lor bann move dimounn li pou vers labrez ek souf anflame; enn labriz kouma dife, samem ki li pou gard pou zot.

⁷ Parski LESEGNER limem drwatir, li kontan bann aksion ki zis, bann ki viv drwat pou viv dan so prezans.