Psom 107 - Nouvo Testaman Kreol Morisien Harmonisation NTPS KM

SINKIEM LIV PSOM ( Psom 107—150 ) Gran mersi Segner Bondie

¹ “Nou dir mersi LESEGNER parski li bon e so lamour infini li eternel!”

² Zot tou ki LESEGNER finn libere, repet sa, zot ki finn libere dan lame adverser,

³ e li finn gid zot lor sime retour depi exil ki zot ti dan les, dan lwes, dan lenor ouswa dan Lesid.

⁴ Ena ti perdi sime dan dezer e pa ti kone kot pou pase pou rant dan sivilizasion.

⁵ Zot ti konn lafin ek laswaf e zot ti pe perdi lespwar.

⁶ Dan zot detres zot ti rapel LESEGNER e dan so bonte li ti konsol zot.

⁷ Li ti tras enn sime drwat ki ti amenn zot direk anvil.

⁸ Zot tou zot bizin dir mersi LESEGNER pou so lamour infini; pou bann mirak an faver limanite.

⁹ Kan gagn swaf li donn dilo; kan gagn fin li donn bon manze.

¹⁰ Ena ki ti plonze dan marenwar; zot ti ansene dan lamizer

¹¹ parski zot ti revolte kont Parol Bondie e zot ti rezet lansegnman Bondie Pli Lao.

¹² Travo forse ti minn zot; zot pa ti kapav tini dibout e ler zot ti tonbe pa ti ena personn pou ed zot.

¹³ Dan zot detres zot ti rapel LESEGNER e dan so bonte li ti konsol zot.

¹⁴ Li ti tir zot dan marenwar, kas zot lasenn.

¹⁵ Zot tou zot bizin dir mersi LESEGNER pou so lamour infini; pou bann mirak an faver limanite.

¹⁶ Li defons laport metal bronz, e fer baro feray anvole.

¹⁷ Ena inbesil ki ti pe soufer parski zot pese ti pe pez lour e osi parski zot ti pe patoz dan lemal;

¹⁸ zot pa ti pe kapav get manze zot ti ena enn lipie dan tom.

¹⁹ Dan zot detres zot ti rapel LESEGNER e dan so bonte li ti konsol zot.

²⁰ Par so parol li ti geri zot, li ti anpes zot rant dan trou lamor.

²¹ Zot tou zot bizin dir mersi LESEGNER pou so lamour infini; pou bann mirak an faver limanite.

²² Zot bizin ofer sakrifis remersiman; ar sante lazwa dir lemond antie grander Bondie.

²³ Ena ki ti travay marin ki ti gagn zot lavi ar travay abor.

²⁴ Zot ti konsian pouvwar LESEGNER e zot ti temwin so bann explwa lor dilo.

²⁵ Kouma li donn lord bann rafal koumans soufle e bann vag lor dilo koumans leve.

²⁶ Bann bato mont lao lor latet vag e apre desann net anba dan profonder bann vag. Dan sa kalite siklonn-la bann marin ti perdi kouraz;

²⁷ zot ti balote kouma soular. Tou zot konesans ek lexperyans ti anglouti.

²⁸ Dan zot detres zot ti kriye LESEGNER e dan so bonte li ti tir zot dan zot langwas.

²⁹ Li ti kalme koler siklonn e bann vag ti koumans kalme.

³⁰ Zot ti ere ki move-tan ti pase e LESEGNER ti ramenn zot dan por.

³¹ Zot tou zot bizin dir mersi LESEGNER pou so lamour infini; pou bann mirak an faver limanite.

³² Zot bizin deklar so grander dan lasanble lepep e sant so louanz divan konsey dirizan.

³³ LESEGNER fer bann larivier sek e bann lasours nepli larg enn sel gout dilo.

³⁴ Li fer later fertil vinn laplenn disel akoz mesanste bann move dimounn ki abit laba.

³⁵ LESEGNER plant bann oazis dan dezer; e later desese ranpli ar lasours dilo.

³⁶ Li amenn dimounn afame vinn viv la e konstrir sivilizasion pou viv ere.

³⁷ Zot sem lagrin, zot plant pie rezin e zot gagn lakoup rekor.

³⁸ Li ti beni so pep e ti fer zot gagn boukou zanfan; anplis li ti anpes zot troupo zanimo diminie.

³⁹ Kan lepep Bondie ti konn defet e ti sibir imiliasion, dominasion ek soufrans,

⁴⁰ li ti montre bann dimounn nob so mepri. Li ti fer zot perdi sime dan dezer.

⁴¹ Me li ti sov bann ki bizin led e fer zot fami peple lor vites.

⁴² Kan bann dimounn drwat ti trouv sa, zot ti santi enn gran lazwa me bann dan lemal ti oblize ferm labous.

⁴³ Tou bann dimounn saz, zame bliye sa! Zame bliye lamour infini nou SEGNER!