Psom 105 - Nouvo Testaman Kreol Morisien Harmonisation NTPS KM

Lesegner Bondie ek so pep

¹ Nou dir mersi LESEGNER, nou proklam so nom! Nou bizin fer tou bann nasion kone tou seki li finn fer.

² Sant pou li, zwe lamizik pou li, rakont tou so bann explwa.

³ Rann glwar so sin nom! Bann ki rod LESEGNER pou dan lazwa.

⁴ Tourn ver LESEGNER e rod so pwisans; zame pa aret rod so prezans.

⁵ Rapel bann mervey ki li finn fer, so bann mirak ek bann zizman li finn prononse,

⁶ zot tou bann desandan Abraam, zot tou bann desandan Zakob, ki li finn swazire.

⁷ LESEGNER, limem nou Bondie; li gouvern lemond antie.

⁸ Zame li pa finn bliye so lalians ki pou dire pou touzour; so promes tini zenerasion apre zenerasion.

⁹ Li pou onor aranzman ki li ti fer ar Abraam; promes li ti fer ar Izaak.

¹⁰ Li ti konfirm sa ar Zakob kouma enn dekre, ar Izrael kouma enn lalians ki pou tini ziska lafin.

¹¹ “Mo pou donn twa pei Kanaan,” li ti dir. “Sa li pou zot; zot par sa.”

¹² Sa lepok-la serviter Bondie ti bien tigit e zot ti bann imigran dan pei Kanaan.

¹³ Zot ale-vini, sorti dan enn rezion al dan lot; sorti dan enn rwayom al dan lot.

¹⁴ Me Bondie pa ti les personn fer dominer ar zot; li ti donn avertisman bann lerwa:

¹⁵ “Pa fer ditor mo bann serviter ki mo finn swazire; pa tous mo bann profet.”

¹⁶ LESEGNER ti avoy lafaminn dan zot pei e ti detrir zot nouritir.

¹⁷ Li ti avoy kikenn divan-divan; Zozef ti so nom, ti vann li kouma esklav.

¹⁸ Li ti ena lasenn dan lipie, serk lasie otour so likou

¹⁹ ziska ki so prediksion vinn vre, ziska ki parol LESEGNER prouve li ena rezon.

²⁰ Lerwa Lezip ti fer larg li; lerwa ki ti pe diriz plizier tribi ti rann li so liberte.

²¹ Li ti fer Zozef vinn sef gouvernman ki ti gouvern pei-la net;

²² li ti gagn drwa donn lord bann ofisie lerwa; li ti ena pouvwar dir bann konseye ki bizin fer.

²³ Lerla Izrael ti al Lezip Zakob ti viv dan pei Lezip kouma imigran.

²⁴ LESEGNER ti donn so bann serviter boukou zanfan; ti fer zot vinn pli for ki zot lennmi.

²⁵ Me li ti fer bann Ezipsien ayir so prop pep e zot fer konplo kont so bann serviter.

²⁶ Lerla li ti avoy so serviter Moiz ek Aaron ki limem ti swazir.

²⁷ Zot ti fer bann sign extraordiner, bann veritab mirak dan Lezip.

²⁸ Li avoy marenwar lor pei Lezip me bann Ezipsien refiz ekout so parol.

²⁹ Li fer larivier dilo vinn disan e touy tou pwason.

³⁰ Ti ena enn invazion krapo; zot ti rant partou, mem dan sato.

³¹ Bondie koze, enn larme mous ki pike, ek moustik anvayir pei-la.

³² Li avoy lagrel olie avoy lapli ek zekler ti eklate partou;

³³ li detrir plantasion, potaze ek verze; li met bann pie partou plat.

³⁴ Kouma li koze, ala enn gran niaz sotrel, sotrel par milion, desann lor pei;

³⁵ zot balie tou bann plant prop, pa les nanye deryer zot dan pei.

³⁶ Li touy tou bann premie garson dan sak fami Ezipsien, premie prodwi zot lafors.

³⁷ Lerla li gid bann Izraelit lor sime liberte, ranpli ar lor ek larzan, parski zot ti for ek an bonn sante personn pa ti res deryer.

³⁸ Bann Ezipsien ti per zot e bann-la ti kontan ler bann Izraelit ti ale.

³⁹ Bondie ti plas enn niaz lor so pep pou protez zot; enn dife pou donn zot lalimier aswar.

⁴⁰ Ler zot rod manze li ti avoy zot bann kay, manze pou plin zot vant ti sorti direk dan lesiel.

⁴¹ Li ti ouver enn ros e dilo kler ti koumans koule e bien vit enn larivier ti pe travers dezer.

⁴² Li ti rapel so promes sakre ki li ti fer ar Abraam, so serviter.

⁴³ Alor li ti fer zot sorti Lezip dan lazwa, pep ki li ti swazir ti sante for-for dan lalegres.

⁴⁴ Li ti partaz ar zot later lezot tribi; zot ti pran posesion larises bann lezot pep.

⁴⁵ Koumsa li ti sir ki so pep ti pou gard so komannman, e pou rapel so bann lalwa. Alelouya, nou sant louanz LESEGNER!