Psom 104 - Nouvo Testaman Kreol Morisien Harmonisation NTPS KM

Anou selebre Bondie Kreater

¹ Ar tou seki mo ete mo dir mersi LESEGNER! SEGNER mo Bondie tomem pli gran. To abiye ar mazeste ek laglwar,

² lalimier anvlop twa kouma enn manto. To finn kree lesiel kouma enn latant zean

³ e to finn ranz to lakaz lor losean seles. To fer bann niaz vinn to kales, e to vwayaz lor lezel divan.

⁴ Divan delivre to mesaz, dife ek zekler exekit to lord.

⁵ To finn kree later lor soubasman solid ki nanye pa pou bouze.

⁶ Lor later to finn met enn tapi dilo ki mont ziska some montagn.

⁷ Kan to ti reprimann dilo, li ti retir li; li ti sove ler li ti tann to instriksion kouma loraz.

⁸ Lor vites li mont lor montagn e redesann, al dan vale, dan landrwa ki to ti fer pou li.

⁹ To ti tras frontier ki li pa ti gagn drwa depase; sa ti pou anpes li deborde pou kouver later.

¹⁰ To finn fer lasours koule dan vale; to finn fer larivier koule ant montagn ek kolinn.

¹¹ Koumsa ena ase dilo pou tou zanimo, bann bourik sovaz ti vinn kalme zot laswaf.

¹² Akote bor dilo, lor bann pie bann zwazo fer zot nik e kapav tann zot sante.

¹³ Depi lesiel lapli tonbe, aroz kolinn ek montagn e later li rasazie ar bienfe to louvraz.

¹⁴ To fer lerb pouse dan patiraz; to fer plant pouse pou dimounn servi; pou li prodir manze pou li viv,

¹⁵ divin pou fer leker kontan, delwil zoliv pou so lasante e dipin pou li gagn lafors.

¹⁶ Bann pie dan lafore gagn bien dilo, sirtou bann pie zean ki LESEGNER limem ti plante.

¹⁷ Laba bann zwazo fer zot nik; bann sigongn fer zot lakaz lor pie sipre.

¹⁸ Kabri sovaz gagn lavi lor montagn, bann liev kasiet parmi bann ros.

¹⁹ To finn kree lalinn pou nou kapav kont bann mwa; soley kone ki ler bizin kouse.

²⁰ To finn kree lanwit ek lobskirite, pou ki zanimo kapav lasas dan nwar;

²¹ bann zenn lion kriye for zot lafin ler zot rod manze ki Bondie finn prepare pou zot.

²² Kan soley leve zot retourn dan zot lakav pou repoze.

²³ Lerla dimounn al okip zot lokipasion ziska ki soley kouse.

²⁴ SEGNER, to finn fer otan kiksoz extra! Sak kiksoz finn kree par to sazes. Later ranpli ar enn trale kreatir ki to finn kree.

²⁵ Get lamer laba, li gran, li profon e li plin ar kreatir, so gran kouma so piti.

²⁶ Lao dilo, bann bato navige, anba, Leviatan, mons marin ki to finn kree pou zwe ar li.

²⁷ Zot tou depann lor twa pou gagn zot nouritir kan zot bizin.

²⁸ To donn zot manze ki nouri zot; kan to ouver to lame, nouritir-la plin zot vant.

²⁹ Kan to vir ledo ar zot, zot gagn per; kan to koup zot souf, zot mor e zot retourn dan lapousier kot zot ti sorti.

³⁰ Kan to soufle to souf to kree zot e later gagn nouvo lavi.

³¹ SEGNER, to laglwar li eternel! SEGNER, trouv to lazwa dan to louvraz.

³² Li zet enn regar lor later e later tranble; li tous montagn e volkan eklate.

³³ Mo pou sant louanz LESEGNER touletan; tanki mo ena lavi mo pou sant so grander.

³⁴ Mo espere ki mo meditasion fer li plezir, parski mo dan lazwa akoz li.

³⁵ Ki bann ki dan lemal zot disparet depi later; bann ki nouri pese fini net dan lemond. Ar tou seki mo ete mo dir mersi LESEGNER! Alelouya, nou sant louanz LESEGNER!