Psom 10 - Nouvo Testaman Kreol Morisien Harmonisation NTPS KM

Segner Bondie, ed mwa kont bann opreser

¹ Kifer to res lwin ar nou, SEGNER? Kifer pa trouv twa dan moman detres?

² Avek arogans move dimounn persekit bann pov; zot may bann-la dan zot latrap.

³ Move dimounn li fier so prop move dezir; dimounn gourman li modi LESEGNER e li pena respe pou li.

⁴ Dan so arogans move dimounn pa pran Bondie kont; dan so panse pena plas pou Bondie.

⁵ Move dimounn reisi tou seki li fer. Li pa konpran lazistis divinn, sa tro lwin pou li e li mepriz so lennmi.

⁶ Li dir ar limem, “Pena nanye ki kapav bouz mwa! Problem ek traka? Zame zot pa pou tous mwa!”

⁷ So labous ranpli ar malediksion; li modi, li koz manti, li menase; anba so lalang ena parol blesan ek mesanste.

⁸ Li kasiet pre ar bann vilaz san defans e atann so ler pou touy inosan; dan kasiet li espionn so viktim;

⁹ li res dan kasiet parey enn lion, li vey so ler pou atake; li ris bann pov, li trenn zot dan so piez.

¹⁰ Bann viktim san defans pa sape e zot tom dan so pouvwar.

¹¹ Dan so panse move dimounn dir, “Bondie pa pran kont; so figir tourn lot kote, zame li pou trouve.”

¹² Lev twa, SEGNER! Lev to lame pou pini zot, Bondie; pa bliye bann ki pe soufer!

¹³ Kifer move dimounn mepriz Bondie? Li dir, “Bondie pa pou demann mwa rann kont.”

¹⁴ Tousala pa vre! To bien trouv tou. To kone ena problem ek soufrans e to pran tou dan to lame. Bann ki feb ek san defans zot remet zotmem dan to lame. To finn touletan vinn osekour orfelin.

¹⁵ Kas lerin move dimounn ki viv dan pese; grenn zot mesanste ziska pa res nanye.

¹⁶ LESEGNER, limem Lerwa pou leternite. Bann ki priye lezot bondie pa pou ena plas dan pei LESEGNER.

¹⁷ SEGNER, to tann dezir bann ti dimounn, to pou ekout bann feb e donn zot kouraz.

¹⁸ To pou rann zistis an faver bann ki pe gagn kraze kouma orfelin; koumsa bann zans ordiner pou aret sem terer.