Psom 1 - Nouvo Testaman Kreol Morisien Harmonisation NTPS KM

PREMIE LIV PSOM ( Psom 1—41 ) Sime vre boner

¹ Bienere sa dimounn ki pa ekout konsey bann ki fer lemal, ki pa swiv sime dimounn ki fer pese, ki pa asiz ar dimounn vantar.

² Okontrer li gagn plezir dan lalwa LESEGNER, e lanwit-lizour li medit lor so lansegnman.

³ Li kouma enn pie ki pous dan bor dilo, ki raport so fri dapre so sezon e so fey res touletan ver. Sa dimounn ere la li touletan prospere.

⁴ Me bann dimounn move pa koumsa; zot kouma lasann lapay ki balie par divan.

⁵ Bann move dimounn pou kondane dan zizman, bann ki fer pese pa pou rant dan lasanble lepep Bondie.

⁶ LESEGNER protez e gid lavi dimounn ki zis, me bann ki fer move pou zwenn lapert ek lamor.