Proverb 9 - Nouvo Testaman Kreol Morisien Harmonisation NTPS KM

Lasazes lans enn linvitasion

¹ Lasazes finn konstrir so lakaz; li finn met set kolonn tini li.

² Li finn prepar laviann ek divin; li finn dres so latab pou festin.

³ Li finn avoy so bann servant kriye dan bann plas piblik:

⁴ “Zot ki inioran, vinn par isi! Zot ki ti-lespri, lasazes pe dir zot:

⁵ Vini, vini! Vinn manz mo dipin; vinn bwar divin ki mo finn prepare.

⁶ Aret fer kouma inioran, e zot pou viv lontan; mars lor sime disernman!”

Diferans ant enn insolan ek enn saz

⁷ Kan to koriz enn insolan, to gagn maltrete; kan to kritik enn move dimounn, to gagn insilte.

⁸ Pa kritik enn insolan; li pou deteste twa. Me si to pas enn remark enn saz, li pou kontan twa.

⁹ Konsey enn saz, e li pou vinn pli saz; ansegn enn dimounn drwat, e li pou vinn pli intelizan.

¹⁰ Rekonet lotorite LESEGNER, samem koumansman lasazes; si to konn Sa-Enn ki sin la, to deza ena bon zizman.

¹¹ Wi! Mwa, lasazes ki pe dir sa! Ar mwa, to pou viv pli lontan; to lavi pou vinn pli long par boukou lane.

¹² Si to saz, twa ki pou gagn lavantaz; me si to viv dan linsolans, to pou bizin pey konsekans.

Enn linvitasion danzere

¹³ Stipidite, li kouma enn fam ki fer tapaz dan vid; li enn inioran ek li pa konpran.

¹⁴ Li nek kas poz divan lakaz, oubien kot bazar lor baz.

¹⁵ Li vey lokazion pou apel bann pasan ki dan zot lokipasion.

¹⁶ Li dir ar bann inioran: “Vinn fer enn letour kot mwa!” Li dir ar bann ti-lespri:

¹⁷ “Dilo ki pa pou twa, so gou pli dou; Manze ki to manz an-sekre gagn pli bon gou.”

¹⁸ Me so bann viktim pa kone ki laba, kot li, ena lamor ki pe fer letour; bann ki finn rant kot li avan, zot deza dan lemond bann mor.