Proverb 8 - Nouvo Testaman Kreol Morisien Harmonisation NTPS KM

Lasazes pe lans enn lapel

¹ Ekoute! Lasazes pe kriye for-for; disernman pe lev so lavwa.

² Lor bann oter, dan bor sime lor lakrwaze, lasazes pe diboute.

³ Dan lantre lavil, divan bann laport, li pe kriye:

⁴ “Ekout mwa, tou imin ki lor later; mo pe lans zot tou enn lapel:

⁵ Zot, bann ti-lespri, aprann gagn disernman; zot ki ankor bet, aprann vinn intelizan.

⁶ Ouver zorey! Ekoute! Tou seki mo pe dir inportan; mo pou pronons bann parol sir.

⁷ Dan mo labous, laverite ki koule; mo lalev deteste tou koze mansonz.

⁸ Mo pe dir zot bann parol laverite; mo pa koz manti ek mo pa tronp dimounn.

⁹ Bann ki ena lespri trouv mo bann parol kler; bann ki ena bon konesans trouv mo koze korek.

¹⁰ Swazir mo bann lansegnman; zot vo plis ki larzan; swazir osi konesans; li vo plis ki lor pir.

¹¹ Mwa, lasazes, mo ena plis valer ki bann bizou; mo pli presie ki tou seki zot kapav dezire.”

Bann tit lasazes

¹² Mwa, lasazes, mo viv avek prekosion; mo devlop konesans atraver boukou refleksion.

¹³ Kan nou respekte LESEGNER, nou deteste lemal. Mwa, lasazes, mo deteste lorgey ek larogans; mo pa siport lemal ek mansonz.

¹⁴ Mo donn bon konsey ek bon rezonnman, mo ena boukou pwisans ek disernman.

¹⁵ Gras-a mwa, bann lerwa regne; gras-a mwa, bann dirizan pas bon lalwa.

¹⁶ Gras-a mwa, bann dirizan gouverne; e bann ziz rann bon zizman.

¹⁷ Mo kontan seki kontan mwa; e bann ki fer zefor rod mwa, pou trouv mwa.

¹⁸ Mwa ki donn larises ek loner; mwa ki donn prosperite ek bann dibien ki dire.

¹⁹ Kado mo done vo plis ki lor, mem lor ki pli bon kalite; mo bann don vo boukou plis ki larzan meyer kalite.

²⁰ Mo mars lor sime ladrwatir, lor sime lazistis.

²¹ Mo donn larises seki kontan mwa; mo ranpli zot kof ar trezor.

Lorizinn lasazes

²² LESEGNER ti kree mwa dan koumansman; mo premie parmi so bann aksion ki li finn fer, ena bien lontan.

²³ Depi koumansman, avan mem ki later ti existe, LESEGNER ti kree mwa.

²⁴ Kan mo ti pran nesans, pa ti ankor ena losean; pa ti ankor ena lasours ek labondans dilo.

²⁵ Mo ti la, avan ki ti donn bann montagn zot form; avan ki ti met bann kolinn anplas.

²⁶ Li ti kree mwa avan ki li ti kree later ek bann plantasion; e avan ki ti ena premie grin lapousier.

²⁷ Kan li ti kree lesiel, kan li ti tras lorizon lor lamer, mo ti la.

²⁸ Kan li ti met bann niaz dan lesiel; kan li ti ouver robine lasours dilo, mo ti la.

²⁹ Kan li ti tras frontier lamer, anpes li depas so limit; kan li ti plas bann fondasion later, mo ti la.

³⁰ Mo ti touzour akote li, kouma enn arsitek; touletan, mo ti fer tou pou fer li plezir; e so prezans ti donn mwa enn gran lazwa.

³¹ Li enn gran plezir viv dan lemond ki li finn kree; li enn gran lazwa viv kot bann imin.

Tou seki ekout lasazes pou viv ere

³² Aster-la, ekout mwa mo bann zanfan: bienere zot, ki mars dan mo sime.

³³ Ekout mo bann konsey; zame pa rezet bann konsey-la, e zot pou vinn saz.

³⁴ Zot bienere, tou dimounn ki ekout mo parol; seki toulezour divan mo laport, e seki touletan dan lantre mo lakaz.

³⁵ Sa-enn ki aksepte mwa la, li ava viv lontan; e li ava gagn faver LESEGNER;

³⁶ Me dimounn ki rezet mwa, li fer limem dimal; dimounn ki pa kontan mwa, li kontan lamor.